Búgin Kókshetaý qalasynda azamattyq belsendi Marat Januzaqovty belgisiz bireý soqqyǵa jyqqan. Marat Januzaqovqa búgin tańerteń shamamen saǵat segizdiń kezinde úıinen shyǵyp, kóshede jaıaý ketip bara jatqan kezde tutqıyldan shabýyl jasalǵan dep habarlaıdy Qamshy.kz aqparat agenttigi azattyq.org-qa silteme jasaı otyryp.
- Ákem bet-álpeti azıalyq belgisiz jigittiń kenetten urǵan soqqysynan eseńgirep qulap qalǵan. Esin jıǵan kezde álgi adam ketip qalypty. Ákem týystaryna habarlap, sosyn polısıa bólimine baryp, ózine shabýyl jasalǵany týraly aryz jazyp tapsyrǵan, - deıdi Aıman Januzaqova.
Qyzynyń aıtýynsha, belgisiz adamnyń soqqysynan ákesiniń sol jaq samaıynan qan aǵyp, isik paıda bolǵan. Marat Januzaqov polısıa qyzmetkerlerine oqıǵa bolǵan jerdi kórsetken kezde ol da birge barǵan. "Polısıanyń oqıǵa ornynan túsirgen sýretterin men kórdim, qan izderi qalǵany anyq kórinedi" deıdi ol.
Aımannyń sózinshe, shabýyl jasaǵan belgisiz adam Marat Januzaqovtyń zattaryna tıispegen. Ol qazir ákesiniń jaǵdaıy birqalypty ekenin, onyń densaýlyq jaǵdaıyn dárigerler zerttep jatqanyn aıtty.
60 jastaǵy Marat Januzaqov Kókshetaý memlekettik ýnıversıtetiniń rektorynyń "ar-ojdanyna" tıgen maqalasy úshin ótken jyly jaýapqa tartylyp, sot oǵan 20 myń teńge aıyppul salǵan.
Ol Qazaqstanda demokratıanyń damýy men azamattyq qoǵam qurýǵa úles qosyp júrgen Qazaqstan jáne shetel azamattaryna 2003 jyldan beri berilip kele jatqan "Azattyq" syılyǵyn tapsyrýshylardyń biri. 2014 jyly Januzaqov atalǵan syılyqty "zańsyz aqshadan qarjylandyrǵan" degen aıyptaý boıynsha tergeýge alynǵan.
Marat Januzaqov 2002 jyly opozısıalyq "Qazaqstan demokratıalyq tańdaýy" qozǵalysynyń Aqmola fılıalyn, onan keıin bılik tirkemeı qoıǵan "Alǵa" opozısıalyq partıasynyń oblystyq fılıalyn basqarǵan. Qazaqstan soty 2012 jyly bul partıanyń qyzmetine tyıym salǵan.
