Eńbek jáne halyqty áleýmettik qorǵaý mınıstri Tamara Dúısenova, oblystar jáne Astana, Almaty qalalary ákimderiniń orynbasarlarymen, halyqty áleýmettik qamsyzdandyrý jáne jumyspen qamtý máseleleri jóninde jıyn ótkizdi dep habarlaıdy Qamshy.kz aqparat agenttigi.

       Sonymen qatar, alqaly basqosýǵa, Eńbek, áleýmettik qorǵaý jáne kóshi-qon komıteti aýmaqtyq departamentteriniń dırektorlary, jergilikti atqarý organdardaǵy jumyspen qamtýdy jáne áleýmettik baǵdarlamalardy úılestirý basqarmalarynyń basshylary, ózge de múddeli taraptar qatysty.     

       Kúntártibindegi basty taqyryp retinde ataýly áleýmettik kómektiń (ári qaraı – AÁK) jańa sıpatyn qoldanysqa engizý, bazalyq zeınetaqyny taǵaıyndaý ádistemesin ózgertý jáne ózin jumyspen qamtyǵan turǵyndar tobymen jumys jaılary talqylandy.  

       Jańa sıpattaǵy AÁK turǵysynda, Mınıstr, jumyspen qamtý ortalyqtaryn kúsheıtý arqyly olardyń materıaldyq-tehnıkalyq jabdyqtalýy men mamandar daıarlaý isine asa mán berý kerek ekenin nusqady.

       «Eger qazirgi tańda AÁK tabysy kúnkóris deńgeıinen 40% tómen adamdar men otbasylarǵa qarjylaı kómek retinde beriletin bolsa, jańa jyldan bastap jan basyna shaqqandaǵy tabysy kúnkóris deńgeıinen 50% tómen otbasylarǵa beriletin bolady. Sonymen birge, jańa sıpattaǵy AÁK  - qazirgi tańdaǵy AÁK, balalar járdemaqysy jáne arnaıy memlekettik járdemaqy sekildi 3 áleýmettik tólemniń ornyna Biryńǵaı járdemaqy túrinde tólenedi. Eń basty eskeretin jaıt, jańa AÁK mólsheri joǵaryda atalǵan 3 túrli járdemaqynyń jalpy somasynan joǵary bolady. Osylaısha, jańa AÁK tek qana qarjylaı járdemaqy ǵana emes, kedeılik deńgeıinen shyǵýdyń keshendi sharasy bolmaq. Járdemaqynyń qoljetimdiligi men bıznes-prosesterdi ońtaılandyrý maqsatynda jumysty bir tereze júıesimen Jumyspen qamtý ortalyqtary arqyly júrgizý usynylady», - dedi Mınıstr.

       Eńbek jáne halyqty áleýmettik qorǵaý mınıstri jınalǵandardyń nazaryn keler jyldan bastap bazalyq zeınetaqy taǵaıyndaý tetigi ózgeretine de aýdardy.

       2018 jyldyń 1 qańtarynan bastap, Memleket basshysynyń tapsyrmasyna saı, yntymaqty zeınetaqy 8 paıyzǵa ósedi. Bazalyq zeınetaqy, basqa da járdemaqy túrleri sıaqty, 6 paıyzǵa kóbeıedi. Osy arqyly, bazalyq zeınetaqyny eskergendegi zeınetaqynyń tómengi mólsheri kelesi jyly 49 019 teńgeni qurap, ortasha dárejesi 71 333 teńgeni tóńirektemek.

       «Qazirgi ýaqytta bazalyq zeınetaqy zeınet jasyna jetkenderge bárine birdeı eńbek ótilin jáne zeınetaqy jınaǵyn qalyptastyrýǵa qatysýdy eskerýsiz taǵaıyndalady. Kelesi jyldan bazalyq zeınetaqy júıege qatysý ótiline qaraı beriletini kózdelýde. Osy oraıda 1998 jyldan keıingi jınaqtaýshy zeınetaqy júıesine zeınetaqy jarnalarynyń túsý aralyǵy ǵana eseptilinip qoımaı, 1998 jylǵa deıingi de eńbek ótili nazarǵa alynatyny boljanýda», - dep túsindirdi Tamara Dýısenova.     

        Mundaı ádis, 30-40 jyl eńbek ótili bolsa da, tómen zeınetaqy alyp otyrǵan adamdarǵa qatysty ádildik ornatatyny kútilýde. 1998 jylǵa deıin jáne odan keıin de 33 jyldan asatyn ótili bar tulǵalarǵa, bazalyq zeınetaqy aǵymdaǵy kólemimen salystyrǵanda eki esege kóbeıedi. Eger bul soma qazir 14 myń teńgeni kórsetse, 2018 jyldyń 1 shildesinen zeınetkerlerdiń atalǵan toby yntymaqty jáne jınaqtaýshy zeınetaqyǵa qosa, 28 myń teńgeni ıemdenetin bolady. 

      10 jyldan asqan ár jyl saıyn bazalyq zeınetaqy 2 paıyzǵa óspek. Máselen, 20 jyldyq eńbek ótilinde bazalyq zeınetaqy eń tómengi kúnkóris deńgeıiniń 74%-yn qurasa, 30 jylda 94%-dy mejelemek. Zańda aıqyndalǵandaı, 33 jyldy eńsergen ótil belesinde bazalyq zeınetaqy kúnkóris deńgeıiniń tolyq 100% kólemin qamtymaq.

      Ózin jumyspen qamtyǵan turǵyndar qyzmetin retteýde 2018-2019 jyldarǵa arnalǵan Jol kartasy jasalýda.

       Tamara Dúısenova, joǵaryda kórsetilgen barlyq mindetterdi qaperge alǵan raıda, Úkimettiń áleýmettik salada júrgizip otyrǵan saıasatyn óńirlerde túsindirý is-qımyldaryn shıratý qajettigin atap ótti.  

        Esterińizge sala keteıik, 2018 jyldyń 1 qańtarynan bastap, Elbasynyń «Ult jospary – 100 naqty qadam» ıdeıasy men  halyqqa Joldaýynan týyndaıtyn tapsyrmalardy júzege asyrý maqsatynda áleýmettik-eńbek salasyn jańǵyrtýǵa baǵyttalǵan keshendi sharalar júzege asady.