14 jasynda Shanhaıda qaza tapqan reseılik sánbıkeniń anasy ol jumysqa ornalasqan sán agenttiginiń talaptary óte qatal ekendigin aıtyp berdi. BAQ quraldary ólim sebebin anyqtaýda. Anasynyń aıtýynsha, jasóspirim Qytaıǵa 3 aılyq kelisimshart boıynsha ketip, qatty aryp-azýdyń nátıjesinde kóz jumǵan. Alaıda dárigerler ólim sebebin menıngıtpen baılanystyryp otyr. Bul týraly Qamshy.kz aqparat agenttigi Mirror basylymyna súıene otyryp jazady.
Qaıǵy jamylǵan anasy qyzynyń kásibı maman bolǵysy kelgendikten, Qytaıǵa kelisimshart boıynsha barýyna ruqsatyn bergenin aıtty. Árıne, olar bul sharttyń tym qatal bolaryn bilmegen, máselen:
«Qyzym maǵan qońyraý shalǵanda: «Mama, men sharshadym, qatty uıqym keledi» dep aıtatyn, men onyń dárigerge kórinýin suradym»,-deıdi. Ol tipti, qyzyna kómegin kórsetý úshin Shanhaıǵa kelmek bolǵan, alaıda úlgere almaǵan.
Mirror basylymynyń habarlaýynsha, boıjetken shyndyǵynda da «quldyq kelisimshartpen» jumys istegen. Oǵan qosa, osy kezde boıjetkenniń medısınalyq saqtandyrýy da áli bolmaǵan. Qyzdyń jan tapsyrýyna Shanhaıda ótken Asian Fashion aptalyǵynda 13 saǵat úzdiksiz sán úlgisin kórsetý is-sharasy sebepker bolýy múmkin. Alaıda basqa aqparat kózderine súıensek, qyz zergerlik buıymdardy kórsetý kezinde ózin nashar sezingen.
Úırenýshilerdiń Shanhaıdaǵy kýratory Elvıra Zaısevanyń aıtýynsha: «qyzdar úzdiksiz jumys istegen joq, kerekti obrazdy sýretke túsirip bolǵasyn, olar basqasha shash úlgisin jasatady. Odan keıin túski as ishedi. Qaıǵyly oqıǵa qatty sharshaǵandyqtan bolýy múmkin emes, Vıka anasyna shaǵymdanyp júrgenin bilemin. Biraq ol osy ýaqyttyń ózinde aýyryp júrgen bolatyn, sondyqtan onyń ólimine eshkim de kináli emes»,-dedi.
«Barlyǵy aıaq astynan tóńkerilip ketti, eshqandaı da 13 saǵattyq jumys bolǵan joq. Ol toptama úshin sýretke túsip jatqan. Sol kezde ol ózin nashar sezinip, temperatýrasy 40 gradýsqa deıin kóterildi, ony birden aýrýhanaǵa jetkizdi, ókinishke oraı dárigerler onyń boıynan qaýipti vırýs taýyp, sharasyz qaldy»,- dedi sánbıkelerdiń kýratory.
«Izvestıa» basylymy qazirde Qytaıda jan tapsyrǵan 14 jastaǵy qyzdyń ólimi jóninde tergeý amaldary júrgizilip jatqandyǵyn jetkizdi.
