«Qazaqstan» teleradıokorporasıasynyń quramyna kiretin 14 aımaqtyq telearnalardyń efırinde aýqymdy ózgerister bastaldy, — dep habarlaıdy Qamshy.kz aqparat agenttigi. Bul týraly saıasatker Erlan Qarın óziniń feısbýk paraqshasyna jazdy. 

«Búgin «Qazaqstan» teleradıokorporasıasynyń quramyna kiretin 14 aımaqtyq telearnalardyń efırinde aýqymdy ózgerister bastaldy. Jańa maýsym aıasynda, efırlerdiń grafıkalyq bezendirilýi, stýdıalardyń dızaıny men dekorasıalary jańartylyp, ár túrli janrdy qamtıtyn jańa baǵdarlamalar kórermenderge usynylady.

Sondaı-aq, barlyq telearnalardyń jeke ataýlary ózgerip, arna logotıpteri korporasıanyń ortaq belgisimen bezendiriledi. Eger buryn, «Qazaqstan - Qaraǵandy», «Qazaqstan – Qyzylorda», «Qazaqstan – Pavlodar», «Qazaqstan – Petropavl» t.b dep atalsa, endi «Saryarqa», «Qyzylorda», «Ertis», «Qyzyljar» bolyp ózgeredi. Ár aımaqtyń burynnan kele jatqan tarıhı jer-sý ataýlary men óńirlerdiń qalyptasqan ataýlary negizge alyndy. Rebrendıngtiń basty maqsaty — korporasıaǵa qarasty aımaqtyq telearnalarǵa jańa serpilis berip, zaman talabyna saı damý joldaryn qarastyryp, sapaly,ıntellektýaldy baǵdarlamalardyń sanyn arttyrý. Jańa maýsym aıasynda aımaqtyq telearnalarda 96 baǵdarlama shyǵady.

Biz múmkindigimizshe kórermenderimizdiń talǵamy men talabyn eskere otyryp, taldaý jasap, sapaly kontent usynýǵa tyrysamyz. Bul jumys aldaǵy ýaqytta da jalǵasatyn bolady», — dep jazdy Erlan Qarın.