Bir aıǵa jýyq ýaqytta Qyrǵyzstan tasymaldaýshylary Qazaqstan Respýblıkasy zańnamasyn 360 ret buzǵan. Bul jaıynda Qamshy.kz aqparat agenttigi QR Investısıalar jáne damý mınıstrliginiń málimetine súıenip habarlaıdy.

Bıyl qazan aıynyń 10-y men 30-y aralyǵynda QR Investısıalar jáne damý mınıstrligi Kólik komıtetiniń ókilderi Qyrǵyz Respýblıkasy tasymaldaýshylary tarapynan jasalǵan 360 zań buzýshylyqty anyqtady. Eseptik kezeńde Qyrǵyz Respýblıkasynyń 3054 avtokólik quraly tekserildi.

Tekseristerdiń nátıjesinde tasymaldaýshylarǵa jalpy somasy 11,8 mıllıon teńge kóleminde aıyppul salyndy. Eń jıi kezdesetin zań buzýshylyq tez búlinetin júkterdi tasymaldaý sertıfıkatynyń bolmaýy.  Mundaı zań buzýshylyqtyń úlesinde 151 derek  bar nemese 40 %-dy quraıdy. 

Sondaı-aq, taýar-kólik júk qujatynyń (CMR) bolmaǵany úshin tasymaldaýshylarǵa 103 ret aıyppul salyndy; salmaq jáne gabarıt parametrlerin saqtamaǵany úshin 69 ret; jolaýshylardy turaqsyz tasymaldaýǵa arnalǵan  qazaqstandyq ruqsat blankileriniń bolmaǵany úshin 13 ret; kabotajdy tasymal jasaǵany úshin –11 ret; júkterdi tasymaldaý erejelerin buzǵany úshin 6 ret; qaýipti júkterdi tasymaldaý erejelerin buzǵany úshin 5 ret jáne taǵy basqa da aıyppuldar salyndy.