Qoıandydaǵy basyp alynǵan jerler zańdastyrylady. Bul týraly búgin Astanada QR Prezıdenti janyndaǵy Ortalyq komýnıkasıalar qyzmetinde ótken brıfıńte Aqmola oblysynyń ákimi Sergeı Kýlagın málim etti.

Eske sala keteıik, bıyl Qoıandyda zańsyz basyp alynǵan jerlerdiń ıeleri úılerin qaldyrýdy surap, bılik kómegine júgingen bolatyn.

"Máseleni sheshýde eshkimniń ózegin teppeı, durys sheshim tabý kerek. Qazir 194 daýly jer telimi bar. Onyń negizgi bóligi osyndaı jaǵdaıdyń týyndaǵanyna kináli emes. Degenmen, onyń ishinde páterleri bar adamdar jer telimderin onyń zańsyz ekenin aldyn ala bile tura basyp alǵandar da bar. Jer telimderin basyp alyp, ony satyp, keıin qaıtadan basyp alýmen aınalysqandar da joq emes. Sonyń barlyǵy zertteledi jáne qoldaýdan qaǵylady. Qandaıda bir sheshim qabyldaý - óte qıyn. Múmkin men buryn-sońdy bolmaǵan sheshim shyǵaramyn", - degen S.Kýlagın onyń birneshe sheshimin usyndy.

"Úılerdiń jartysy - memlekettik, jartysy - jekemenshik jerlerde ornalasqan. Menińshe, olardy zańdastyrýǵa barýymyz yqtımal. Ekinshiden, irgetasy ǵana quıylǵan jerlerdi súrýimiz múmkin. Olarǵa jekemenshik jerlerge kóshýge usynys jasaımyz. Olar bas josparǵa sáıkes ornalasýy tıis. 194 jer telimin qaldyratyn bolamyz. Biraq basty másele - 45 úıdiń máselesi. Olar bas josparǵa sáıkes salynbaǵan. Dál joldyń ústinde tur. Iaǵnı aýylǵa ınjenerlik komýnıkasıalar kelmeıdi degen sóz. Sondyqtan olar bizdiń de jaǵdaıymyzdy túsinip, úılerin jyljytýlary qajet. Olarǵa jer telimderin qaldyramyz. Bul tek 194 jer teliminiń máselesi. Eger 195-shi jer telimi paıda bolsa, sotsyz, tergeýsiz súrip tastaımyz", - dedi oblys basshysy.

Onyń aıtýynsha, daýdyń ortasynda qalǵan qarapaıym halyq kináli emes, sondyqtan bılik olarǵa kómektesedi.

"Másele óte aýyr jáne ol bir kúnniń máselesi emes. Jerdi zańsyz basyp alý túıtkili 2007 jyldan beri kele jatyr. Munda tek adamdardy kinálaý durys emes. Basym rette bılik kináli dep te sanaımyn. 2007 jyly adamdar syrttan kelip, jer telimine qazyq qaqqan, keıin irgetasyn quıǵan kezde aýyl ákimi men ýchaskelik ınspektor nemquraıly qaraǵan. Keıin úı turǵyzylǵanda osyndaı shı shyqty", - dedi aımaq jetekshisi.

"QazAqparat"