Aıagóz aýdanynda «Qozy Kórpesh – Baıan Sulý» kesenesine barar joldaǵy Aıagóz ózeni arqyly jańa kópir paıdalanýǵa berildi, dep habarlaıdy SHQO Aqparattyq ortalyǵy.
«Mádenı mura» baǵdarlamasyn júzege asyrý jáne týrızmdi damytý maqsatynda salynǵan bul kópir – ult tarıhynyń ulaǵatyna, mádenıetimizdiń muraǵatyna aınalǵan «Qozy Kórpesh – Baıan Sulý» munarasyn óskeleń urpaqpen jalǵaıtyn altyn kópir. Qazaqtyń brendi, mahabbat sımvolyna aınalǵan «Qozy Kórpesh – Baıan Sulý» kesenesine barar joldaǵy Aıagóz ózeniniń ústinen 146 metrlik kópir salyndy. Kópir aıaqtalǵan jerden bastap kesenege deıin 900 metrlik tas jol tóseldi. Sonymen qatar, bul kópir Tarlaýly aýyldyq okrýgin Shubartaý óńirimen de baılanystyrady.
2012 jyly respýblıkalyq búdjetten tas joldyń jóndeýine 375 mln teńge, jańa kópirdi turǵyzýǵa 100 mln teńge qarajat bólingen bolatyn. Aǵymdaǵy jyly respýblıkalyq búdjetten 20 mln teńge, oblystyq búdjetten qosymsha 46 mln teńge qarjy bólinip, jańa kópir josparǵa sáıkes halyqqa paıdalanýǵa berildi.
