Almatyda quqyqtyq qyzmet kórsetetin ortalyq ashyldy. Ortalyqtyń ashylýyna Qazaqstan Respýblıkasynyń Bas prokýrory Jaqyp Asanov pen Almaty qalasynyń ákimi Baýyrjan Baıbek qatysty.

«Bir tereze» qaǵıdasy boıynsha jumys isteıtin quqyqtyq qyzmet kórsetý ortalyǵynan qala turǵyndary naqty is boıynsha ózderine qajet barlyq aqparattardy bile alady. Jumys formaty halyqqa qyzmet kórsetý ortalyqtarynyń jumysyna uqsas, kelýshiler aldymen resepshnnen ótip, keńes alady. Sodan soń ózderin tolǵandyrǵan másele boıynsha operatorlarǵa barady, olar kelýshilerdi prokýrorlarǵa, advokattarǵa, medıatorlarǵa jáne basqa da mamandarǵa jiberedi. Zańgerlik qyzmet tegin kórsetiledi.

Quqyqtyq qyzmet ortalyǵynyń jalpy kólemi 600 sharshy metr, ol zamanaýı ınjenerlik-tehnıkalyq qondyrǵylarmen jabdyqtalǵan. Jaıly keńsede elektrondy kezek júıesi, «Connection Point» ózine-ózi qyzmet kórsetý sektory, kútý zaly jáne basqa qajetti ınfraqurylymdar bar. Ortalyq qabyrǵalary shynydan jasalǵan, ol quqyq qorǵaý qurylymdarynyń ashyqtyqtyǵyn, jarıalylyǵyn qamtamasyz etedi.

«Taıaýda ǵana biz qalada túrli normatıvti - quqyqtyq aktilermen reglamenttelmegen ári turǵyndardyń túrli máselelerin sheshýge kómektesetin «Open Almaty» qoǵamdyq qabyldaýyn ashqan edik. «Bir tereze» qaǵıdasy boıynsha túrli keńester alýǵa, memlekettik organdarǵa ózderiniń ótinimderin berýlerine bolady. Bulardan ózge, qalada «Visit Almaty» týrısik- aqparattyq ortalyǵy da ashyldy. Qalaǵa kelgen árbir sheteldik qonaq ózine qajetti málimetterdi alady jáne olarǵa túrli keńester beriledi. Quqyqtyq qyzmet kórsetý ortalyǵynyń da memlekettik organdardyń tıimdiligin, ashyqtyǵyn jáne esep berýin jaqsartýdyń mańyzdy quralyna aınalatyndyǵyna senimdimin», - dep atap ótti Almaty ákimi Baýyrjan Baıbek.

Elimizdiń Bas prokýrory Jaqyp Asanov ortalyqtyń negizgi mindetterine toqtaldy. Ortalyq mindetine quqyq qorǵaý júıesine degen senimdilikti kúsheıtý, búrokrattyqty jáne ákimshilik kedergilerdi joıý, quqtyq qyzmetti qoljetimdi etý, quqyq qorǵaý organdarynyń jumys tıimdiligin arttyrý sekildi qyzmet túrleri kiredi.

«Ortalyqtyń mindeti sapaly quqyqtyq qyzmet kórsetý. Árbir almatylyq quqyq qorǵaý ortalyǵyna kelgen soń sapaly kómek alatynyna senimdi bolýy tıis. Bizdi qoldaǵan jáne ortalyqtyń ashylýyna barlyq jaǵdaıdy jasaǵan Almaty ákimdigine alǵysymdy bildiremin. Ortalyq qyzmetkerleriniń basty mindeti - sapaly qyzmetti qamtamasyz etý», - dedi J.Asanov.

Bas prokýror Memleket basshysynyń «Sıfrly Qazaqstan» baǵdarlamasyna aıryqsha nazar aýdaratynyn, osyǵan oraı qazirgi kezde vedomstvoda barlyq qylmystyq jáne ákimshilik prosesterdi sıfrly formatqa kóshirý úshin aýqymdy jumystar júrip jatqanyn aıtty.