Óskemen qalasyndaǵy Metalýrgter mádenıet saraıynda Elbasy Nursultan Nazarbaevtyń atynan balalar úıiniń tárbıelenýshileri men jaǵdaıy tómen otbasylardyń balalaryna, oqý ozattaryna jáne ár túrli baıqaýlardyń jeńimpazdaryna arnalǵan dástúrli jańajyldyq shyrsha bolyp ótti. Sharaǵa qatysqan 200 balanyń barlyǵyna planshet syıǵa berildi, dep habarlaıdy SHQO Aqparattyq ortalyǵy.
Bala kúlkisi shalqyǵan Óskemenniń tórinde balalarǵa arnaıy merekelik baǵdarlama usynyldy. Oblystyq Jambyl atyndaǵy drama teatry men mektepterden, mýzyka mektepterinen jınalǵan 200-ge tarta ártis búldirshinderdi qyzyqqa bóledi.
Shyrshaǵa jınalǵan 9-13 jas aralyǵyndaǵy oqý ozattary, jetimder men ata-anasynyń qamqorlyǵynsyz qalǵan balalar Elbasynyń ózderine arnaǵan beınejazbadaǵy quttyqtaý sózin qýana tamashalady.
Sondaı-aq, jańa jyldyq shyrsha merekesine qatysýshylardyń beıimdelý úderisin jeńildetý, bir-birimen tanystyra dostastyrý maqsatynda psıhologıalyq trenınıgter ótkizildi. Shara sońynda balalardyń qýanyshy tipti eselene tústi. Jyl boıy úzdik oqyp, Prezıdent shyrshasyna qatysý baqyty buıyrǵan 200 balanyń barlyǵyna planshetter tabystaldy.
– 1-synyptan beri sabaqtardan tek 5 alyp kelemin. Búgin konsertke de toptyq bımen qatystym. Planshet alǵanyma óte qýanyshtymyn. Jaqsy oqyp kelesi jyly da shyrshaǵa qatysqym keledi, – dep qýanyshymen bólisti Semeıdegi «Úmit» balalar úıinde turatyn 6-shi synyptyń oqýshysy
Ernur Jádrenov
