Aıagóz aýdany, Bıdaıyq aýyldyq okrýginde Ábeýlov atyndaǵy 80 oryndyq jańa mektep paıdalanýǵa berildi, dep habarlaıdy SHQO Aqparattyq ortalyǵy.

Mektep qurylysy men jabdyqtaryna oblystyq búdjetten 355 mln. tenge qarajat bólingen. Atalmysh oqý ornynda 60 oryndyqty Akt zaly, asqana, 3 bastaýysh synyby, 1 mýltımedıalyq kabınet, ınformatıka, fızıka, hımıa, tehnologıa kabınetteri barlyq qajetti quraldarmen tolyq jabdyqtaldy. Mektepte barlyǵy 124 oqýshy tirkelip, 55 adam (29 muǵalim, 5 tárbıeshi, 21 teh.qyzmetker) jumyspen qamtyldy.

Mekteptiń ashylý saltanatyna qatysqan SHQO ákiminiń orynbasary Jaqsylyq Omar aýdandaǵy ózge mektepter de ınjenerlik-tehnıkalyq saraptamadan ótkizilip, apattyq dep tanylǵan mektepter kúrdeli jóndeýden ótkiziletinin málimdedi. «Elbasynyń Joldaýynyń mańdaıaldy maqsattarynyń biri – halyq sanynyń ósip, demografıalyq jaǵdaıdyń jaqsarýyna oraı týyndaıtyn mektep jasyndaǵy balalar mekemelerindegi oryn tapshylyǵyn tómendetý. Sońǵy jyldary atalmysh baǵdarlamalar sheńberinde óńirimizde áleýmettik mańyzy zor nysandar boı kóterip, el ıgiligine jaratylýda. 2012 jyly Bilim departamenti júrgizgen saraptama qorytyndysyna sáıkes Aqshı, Qaraǵash, Bıdaıyq aýyldaryndaǵy orta mektepter apattyq jaǵdaıda dep tanylǵan. Qazirgi tańda Aqshı men Qaraǵash aýyldarynda jańa mektepter boı kóterdi. Búgin Bıdaıyq aýylyna da bilim ordasy paıdalanýǵa berildi. Barsha Bıdaıyq aýylynyń turǵyndaryn qýanyshymen quttyqtaımyn», – dedi J. Omar.