Reseılik «Den TV» telearnasyndaǵy «Slovo ı delo» baǵdarlamasynyń qonaǵy jazýshy Edýard Lımonov Nazarbaevtan keıingi Qazaqstan týraly jáne Qazaqstan jeri týraly pikir bildiredi dep jazady Qamshy.kz aqparat agenttigi.  

Baǵdaralama barysynda Lımonov Pýtınniń shyn máninde óte jumsaq ekenin aıtady. Sebebi tarıh kórsetkendeı odan da qatigez adamdar basshylyqta bolǵanyn mysalǵa keltiredi. Solardyń biri Stalın ekenin aıtyp ótedi. Baǵdarlama júrgizýshisi Sergeı Harsyzov kórshi elderge Pýtınniń jumsaqtyq tanytyp otyrǵanyn aıtady. Kórshi el dep qandaı eldi meńzep turǵany belgili.

Jazýshy Ýkraınanyń bolashaǵy týraly óz boljamymen bólisedi de áńgimesin Nazarbaevsyz Qazaqstan degen taqyrypta jalǵastyrady. Onyń oıynsha, Nazarbaev bılikten ketkennen keıin el arasynda búlik shyǵady. Ol birden emes, birneshe jyldan keıin de bolýy múmkin ekenin aıtady. Sol ýaqytta Pýtınniń máseleni óz qolyna alýyna týra keledi eken. Reseı prezıdentiniń «Orys álemi» dep júrgenine biraz ýaqyt bolǵanyn aıta kele, Qazaqstannyń soltústigindegi jerler Reseıge tıesili ekenin aıtady. Ol ýaqytta ekranǵa Qazaqstannyń kartasyn shyǵaryp, ony Oraldan bastap Óskemenge deıingi jerlerdi Reseıdiń jeri dep kórsetedi. Tipti atalǵan aımaqtarǵa «Kazahskaıa Novorossıa» dep jazyp ta qoıǵan. Lımonov sol jerlerdi jaýlap almaý úlken kúná ekenin qadap aıtady.

Qazaqstanda 4 mıllıon orys turatynyn jáne nemisterdiń barshylyq ekenin aıta kele, nemisterdiń olardy tolyq qoldaıtynyna senimdilik bildirip otyr. Orystardyń shyn máninde resmı jarıalanǵan sannan kóp dep oılaıtynyn da jasyrmady.