Qazaqstan, Túrkimenstan men Ózbekstan Syrtqy ister mınıstrleri úsh eldiń memlekettik shekaralarynyń túıisý núktesi týraly kelisimge qol qoıdy, dep habarlaıdy Qamshy.kz aqparat agenttigi.
QR SİM baspasóz qyzmetiniń habarlaýynsha, qol qoıý rásimi Samarkand qalasynda Birikken Ulttar Uıymynyń «Ortalyq Azıa: tarıhy bir, bolashaǵy bir, turaqty damý men ózara órkendeý jolyndaǵy yntymaqtastyq» atty halyqaralyq konferensıasy aıasynda ótti.
Saltanatty rásimge Qazaqstannyń Syrtqy ister mınıstri Qaırat Ábdirahmanov, Túrkimenstannyń Mınıstrler Kabıneti Tóraǵasynyń orynbasary – Syrtqy ister mınıstri Rashıd Meredov jáne Ózbekstannyń Syrtqy ister mınıstri Abdýlazız Kamılov qatysty.
Shekaranyń túıisý núktesi týraly kelisimge qol qoıý Qazaqstan, Túrkimenstan jáne Ózbekstan arasyndaǵy memlekettik shekarany halyqaralyq-quqyqtyq resimdeýdiń bir kezeńin tolyǵymen aıaqtaýǵa múmkindik berip, úsh memlekettiń ózara syılastyǵyn, egemendi teńdigi men aýmaqtyq tutastyǵyn nyǵaıtýǵa negiz bolady.
«Qazaqstan Prezıdenti Nursultan Nazarbaev táýelsizdigimizdiń alǵash kúninen bastap memlekettik shekaranyń delımıtasıasyn birinshi kezekke qoıǵan. Shyn máninde, bul memlekettiń jaýapty qurylymy men qaýipsizdiginiń máselesi bolyp tabylady. Búgin qol qoıylǵan úsh jaqty kelisim, negizinen, Ortalyq Azıa úshin tarıhı bolyp tabylady, sebebi ol úsh memleketimizdiń memlekettik shekaralaryn quqyqtyq resimdeýin qorytyndylaıdy», - dedi Syrtqy ister mınıstri Qaırat Ábdirahmanov qol qoıý rásimi aıaqtalǵannan keıin.
Buryn Qazaqstan Túrkimenstanmen jáne Ózbekstanmen ekijaqty deńgeıde shekaralar boıynsha ýaǵdalastyqtarǵa qol jetkizgen bolatyn. Qazaqstan Respýblıkasy men Túrkimenstan arasyndaǵy Qazaqstan-Túrkimenstan Memlekettik shekarasyn delımıtasıalaý jáne ony demarkasıalaý úderisi týraly kelisimge 2001 jylǵy 5 shildede, Qazaqstan Respýblıkasy men Túrkimenstan arasyndaǵy Qazaqstan–Túrkimenstan Memlekettik shekarasyn demarkasıalaý týraly kelisimge 2017 jylǵy 18 sáýirde, Qazaqstan Respýblıkasy men Ózbekstan Respýblıkasy arasyndaǵy Qazaqstan–Ózbekstan Memlekettik shekarasy týraly kelisimge 2001 jylǵy 16 qarashada, Qazaqstan–Ózbekstan memlekettik shekarasynyń jeke ýchaskileri týraly shartqa 2002 jyly 9 qyrkúıekte qol qoıylǵan.
