Búgin Bishkekte Almazbek Atambaev prezıdenttiginiń nátıjesi jarıalanǵan qorytyndy baspasóz máslıhaty boldy. Jalpy aıtqanda, Atambaev asa mańyzdy eshteńe aıta qoıǵan joq. Ol pikirin tek túrli emosıaǵa salyp qana bir sózdi, bir oıdy basqasha jetkizip otyrdy. Bul týraly Qazaqstannyń Halyqaralyq qatynastar jónindegi keńesiniń tóraǵasy Erlan Qarın málimdedi, dep jazady Qamshy.kz aqparat agenttigi.
«Baspasóz máslıhaty bolmas buryn, 2-3 saǵatqa sozylatyn uzaq otyrys bolatyny jarıalanǵan. Degenmen, Atambaev onda prezıdenttigin qorytyndylaıtyn mańyzy bar eshteme qosqan joq. Máselen, ol jańa bir jalpylama sandyq nátıje kórsetkishi nemese faktilermen bólispeı, ádettegisinshe, Qazaqstanǵa shabýyl jasaýmen ǵana boldy. Biraq onyń barlyǵy aldyn ala oı eleginen ótkizilgen. Sebebi Qazaqstandy aralastyra otyryp, ol qyrǵyz halqynyń naqty prezıdenttik qorytyndy týraly taqyryptan adastyrýdy kózdegen.
«Atambaev antıqazaqy málimdemelerimen eldiń nazaryn negizgi máseleden aýdarýdy oılaıdy. Sebebi, nátıje aıtarlyqtaı kóńil qonshytarlyq emes - Atambaev óziniń muragerine kóptegen sheshimi tabylmaǵan máseleler qaldyra otyryp, prezıdenttik taqty tastap barady. Ekonomıkalyq saıasatta da ol jaǵdaıdy jaqsarta almaı, tek eldiń jaǵdaıyn qıyndata tústi. Memlekettik búdjettiń jetispeýshiligi 2016 jyly 20 mlrd somdy quraǵan bolatyn.
Bul Qyrǵyzstan úshin 20 jyldyń ishinde eń rekordty kórsetkish ekenin aıta ketken jón. Atambaev prezıdent bola bastaǵan 2011 jyldan beri búdjettiń jetispeýshiligi 50 paıyzdan asyp ketti. Buǵan qosa jetispeýshilikti ishki qarjy kózderi esebinen jabý boıynsha kórsetkish 6,5 mlrd somdy quraǵan bolatyn. Al qazir ol san 19 mlrd somǵa jetti», - deıdi ol. Erlan Qarın óz sózinde basqasha aıtqanda, ketip bara jatqan prezıdent jetispeýshilikti jabý úshin (75 paıyzyn) syrtqy qarjy kózderin paıdalana otyryp, memlekettiń qaryzyn ósirip jibergenin aıtady.
Al memlekettik qaryz Qyrǵyzstanda Jalpy ishki ónimniń 62 paıyzyn qurap otyr. Bul da sońǵy 25 jyldaǵy rekordtyq kórsetkish. «Osydan-aq Qazaqstannyń naqty maqsatty qajettilikke bermek bolǵan 100 mln dollarynan Atambaevtyń nege bas tartqanyn ańǵarýǵa bolady. EAEO-nyń ortaq strategıasy úshin, ıaǵnı fıtosanıtarlyq jáne kedendik baqylaýdy kúsheıtý maqsatynda bólingeli otyrǵan qarajatty Atambaev pen onyń komandasy búdjettiń jyrtyǵyn jamaý úshin qoldanbaq bolǵan. Bunyń iske aspaıtynyn bilgennen keıin olar sırkke uqsas qoıylymdy uıymdastyryp jiberdi», - deıdi Erlan Qarın.
Saıasattanýshy sonymen birge, saıası turǵyda da Atambaev prezıdenttiginiń qorytyndysy birkelki emestigin bildirdi.
«Saıası alań bir-birinen aýytqyp qaldy, ol barlyq oponentterin saıası keńistikke ysyryp tastady. 2010 jyly ózi birge Sáýir tóńkerisin uıymdastyrǵan jaqtastarynyń barlyǵymen janjaldasty. Elde dinı radıkalızm beleń alyp barady. Qyrǵyzstannyń Qazaqstanmen ǵana emes, birsypyra eldermen qarym-qatynasy nasharlaı tústi.
Buǵan qosa ol popýlısik málimdemeler jasaı otyryp, sanaly túrde kelesi prezıdenttiń jumysyna kedergi keltirip jatyr. Sondyqtan, jalpy qorytyndyǵa «jaǵymsyz» dep baǵa berýge bolady. Atambaev bul máselelerdi sheshýge kúsh salmastan ketip barady. Endigi kezekte, osynaý Atambaev «muraǵa qaldyrǵan máselelerdiń» barlyǵyn murageri sheshýi kerek bolady», - deıdi Erlan Qarın.
