22 qarashada Úkimet úıinde QR Premer-mınıstri Baqytjan Saǵyntaevtyń tóraǵalyǵymen sıfrlandyrý jóninde keńes ótti, dep habarlaıdy Qamshy.kz aqparat agenttigi primeminister.kz portalyna silteme jasap.

Kezdesý barysynda «EKSPO-2017» nysandary bazasynda Astana Hub halyqaralyq startaptar tehnoparkiniń qyzmetin uıymdastyrý máseleleri talqylandy. Budan ózge «elektrondy úkimetti» damytý sharalary, sonyń ishinde elektrondy formatta usynylatyn memlekettik qyzmetter tizimin keńeıtý jáne halyqtyń sıfrlyq saýattylyǵyn arttyrý tetikteri qaraldy.

Aıta ketsek, atalǵan baǵdarlamany prezıdentke alǵash tanystyrǵanda: «Bul elimizdiń tehnologıalyq turǵydan damýyna tyń serpin berip, 2050 jyly damyǵan 30 memlekettiń qataryna kirýge múmkindik beretin tásil. Atalǵan baǵdarlamany jasaý barysynda Úkimet tarapynan ǵalamdaǵy syn-tegeýrinder men múmkindikter eskerildi. Osyǵan baılanysty 2 baǵyt anyqtaldy. Birinshiden, sıfrlandyrý prosesiniń turaqty bolýy úshin ınovasıalyq damýdy qamtamasyz etetin uzaq merzimdegi ınstıttýttardy qurý. Ekinshiden, baǵdarlamanyń oıdaǵydaı júzege asýy úshin naqty sektordy naqty jobalarmen qamtamasyz etý. Osy oraıda Úkimet jeńildetilgen sıfrlandyrý strategıasyn tańdady. Ol 9 negizgi sektorda júrgiziledi. Sonymen qatar, energetıka, shıkizat jáne AÓK, óndiris, logıstıka salalary men aqparattyq tehnologıalar ortalyǵyna basymdyq beriledi», - degen bolatyn QR Premer-mınıstri.