Qazaqstan Respýblıkasynyń Memlekettik hatshysy Gúlshara Ábdiqalyqovanyń tóraǵalyǵymen Memlekettik rámizder men vedimistik jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komısıanyń keńeıtilgen otyrysy ótti, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Jıynǵa Parlament depýtattary, ortalyq jáne jergilikti atqarýshy organdar basshylary, qoǵam qaıratkerleri, belgili ǵalymdar qatysty.

Memlekettik hatshy sóılegen sózinde Nursultan Nazarbaevtyń: «Eki dáýir túıisken óliara shaqta Qazaqstanǵa túbegeıli jańǵyrý jáne jańa ıdeıalar arqyly bolashaǵyn baıandy ete túsýdiń teńdessiz tarıhı múmkindigi berilip otyr», – degen pikirin atap ótti. Bul múmkindikti tıimdi paıdalaný jáne oǵan laıyqty úles qosý – bizdiń ortaq mindetimiz.

Basqosýda Memlekettik qyzmet isteri jáne sybaılas jemqorlyqqa qarsy is-qımyl agenttiginiń, Qarjy mınıstrliginiń, sondaı-aq, Atyraý, Qostanaı jáne Mańǵystaý oblystary ákimderiniń memlekettik rámizderdi paıdalaný, qoldaný jáne nasıhattaý isiniń óńirlerdegi jaı-kúıi jónindegi esebi tyńdaldy.

Sonymen qatar Qorǵanys jáne aeroǵarysh ónerkásibi, Investısıalar jáne damý mınıstrlikteriniń, «Syrbar» syrtqy barlaý qyzmetiniń vedimistik nagradalaryn bekitý týraly usynystary tyńdaldy.

Komısıanyń bıylǵy qyzmeti jáne 2018 jylǵa arnalǵan jumys jospary jónindegi másele qaraldy. Memlekettik organdar basshylaryna memlekettik rámizder týraly zańnamalardyń buzylýyna jol bermeý, sonyń ishinde ishki baqylaýdy turaqty qamtamasyz etý, qoldanys tájirıbelerin jetildirý, sonymen qatar memlekettik rámizderdi qoldaný men nasıhattaý isine baqylaýdy kúsheıtý tapsyryldy.

Otyrys qorytyndysy boıynsha memlekettik rámizderge qatysty quqyqtyq saýattylyqty jáne oǵan degen qurmetti arttyrý jóninde naqty tapsyrmalar berildi.

Sońynda Qazaqstan Respýblıkasynyń Memlekettik hatshysy Gúlshara Ábdiqalyqova jınalǵandardy alda kele jatqan memlekettik mereke – Qazaqstan Respýblıkasynyń Tuńǵysh Prezıdenti kúnimen quttyqtady.