Qazaqstan |Respýblıkasynyń Qorǵanys mınıstriniń orynbasary general-leıtenant Talǵat Muhtarovtyń jetekshilik etýimen Qazaqstan Respýblıkasy Qorǵanys mınıstrliginiń delegasıasy jumys saparymen Úndistan Respýblıkasynyń Nú-Delı qalasyna bardy. Sapar barysynda Úndistannyń Qorǵanys mınıstri Nırmala Sıtaraman hanymmen, Úndistan Qarýly Kúshteri Qurlyq áskerleriniń bas qolbasshysy general Bıpın Ravat jáne qorǵanys isteri jónindegi memlekettik hatshy Sandjaı Mıtramen kezdesýler ótti. Mınıstrliktiń baspasóz qyzmeti málim etkendeı, kezdesý aıasynda taraptar qazaqstandyq bitimgershilik rotanyń BUU mısıasynda úndiler kontıngentiniń quramynda qatysýy, sondaı-aq qorǵanys salasyndaǵy ekijaqty yntymaqtastyq máselelerin talqyǵa saldy. Úndistan Qorǵanys mınıstrligi men Qarýly Kúshteriniń basshylyǵymen kezdesýler jan-jaqty, senimdi sıpatta ótti. Sapar qorytyndysy boıynsha úndilik tarap qorǵanys salasynda Qazaqstanmen ózara is-qımyldy ári qaraı nyǵaıta túsýge qyzyǵýshylyǵyn bildirdi.
Sondaı-aq Úndistan Respýblıkasynyń Bakloh qalasynda Qazaqstan Respýblıkasy men Úndistan Respýblıkasy Qarýly Kúshteriniń arnaıy maqsattaǵy bólimsheleriniń qatysýymen «Prabal-Dostyq-2017» kezekti ekijaqty lańkestikke qarsy oqý-jattyǵýy ótti. Úndistan Respýblıkasynyń Bakloh qalasynda «NOD» daıyndyq ortalyǵynyń bazasynda eki eldiń qorǵanys vedomstvolarynyń arasyndaǵy ekijaqty áskerı yntymaqtastyq josparyna sáıkes lańkestikke qarsy oqý-jattyǵý ótkizilýde. Oǵan Qazaqstan Respýblıkasy men Úndistan Qarýly Kúshteriniń elýden asa áskerı qyzmetshisi qatysýda. Oqý-jattyǵýdyń maqsaty lańkestikke qarsy is-sharalardy ótkizý jáne eldi mekenderde jaýyngerlik is-qımyldardy júrgizý, zańsyz qarýly quralymdardy anyqtaý, oqshaýlaý jáne joıý kezinde bólimshelerdiń taktıkasy men is-qımyldarynyń máselelerin pysyqtaý bolyp tabylady.
Sondaı-aq Qazaqstannyń áskerı yntymaqtastyǵynyń jan-jaqty nyǵaıǵanyn taǵy bir derek dáleldeı túskendeı. Qazaqstannyń áskerı delegasıasy Qorǵanys mınıstriniń basshylyq etýimen 15 – halyqaralyq «Dubai Airshow 2017» kórmesine qatysty. «Dubai Airshow» Úkimet pen Birikken Arab Ámirlikteri Qarýly Kúshteriniń qoldaýymen ótkiziletin áskerı jáne azamattyq avıaónerkásip salasyndaǵy jetekshi álemdik oqıǵa bolyp tabylady. Avıasıalyq-ǵarysh salonynyń jumysy barysynda qazaqstandyq delegasıa áskerı, onyń ishinde, ushqyshsyz avıasıanyń tyń jańalyqtary jáne damý úrdisterimen tanysty. Kórme sheńberinde Qorǵanys mınıstri BAÁ qorǵanys isteri jónindegi memlekettik mınıstri sheıh Muhammed ben Ahmed Ál-Baýardımen kezdesti. Taraptar áskerı yntymaqtastyqtyń damýynyń keleshek baǵyttaryn talqylady jáne olardy josparly negizge kóshirý týraly taraptardyń nıetterin rastady.
–BAÁ ámirshisi Sheıh Zaıd ben Sultan Ál-Nahaıan jáne QR Prezıdenti Nursultan Nazarbaev negizin qalaǵan elderimiz arasyndaǵy senimdilik qarym-qatynastar jyl saıyn nyǵaıa túsýde jáne anaǵurlym joǵary deńgeıge shyǵyp keledi. Qatysýshylar retinde jáne baqylaýshylar retinde bolsyn, Qazaqstan Respýblıkasynyń aýmaǵynda ótkiziletin oqý-jattyǵýlar men saıystarǵa BAÁ Qarýly Kúshteri áskerı qyzmetshileriniń jaýyngerlik daıarlyǵy men qatysýyna aıryqsha nazar aýdarǵym keledi, – dep Qazaqstan Respýblıkasy Qorǵanys mınıstri quttyqtaý sózinde atap ótti. Sondaı-aq qazaqstandyq áskerı vedomstvo basshysynyń BAÁ Bas shtabynyń bastyǵy general-leıtenant Hamad Muhammed Tanı Ál-Rýmeısımen kelissózderi ótti. Onda óńirlik qaýipsizdik, zamanaýı qaýip-qaterlerge tótep berý máseleleri jóninde pikir almasý ótkizildi. Odan basqa, BAÁ ÁÁK qolbasshysy avıasıa general-maıory Ibragım Naser Ál-Alaýıdiń bastamasymen QR QK Áýe qorǵanysy kúshteriniń bas qolbasshysy avıasıa general-maıory Nurlan Kárbenovpen kezdesý uıymdastyryldy. Delegasıanyń ótkizgen jumys qorytyndysy boıynsha taıaý bolashaqta qorǵanys salasyndaǵy Qazaqstan men Birikken Arab Ámirlikteri ózara is-qımylyn damytý men nyǵaıtýdyń qosymsha baǵyttary aıqyndaldy.
