Alash jurty úshin aıtýly data
2017 jyl... Barsha qazaq jurtshylyǵy úshin eleýli ýaqyt. Bul jyly Alashorda úkimetiniń qurylǵanyna ǵasyr toldy. Alashorda úkimetin qurǵan Alash zıalylary – búgingi táýelsiz Qazaq eliniń negizin qalap ketken tarıhı tulǵalar. Olar – sovettik qyzyl qyrǵynda qýǵyn-súrginge ushyraǵan jandar. Búgingi Táýelsiz Qazaqstannyń jolynda jan qıǵan Alash arystarynyń erligin dáriptep, Alash ıdeıasyn keıingi urpaqqa úlgi etý – ár qazaqtyń boryshy.
5 sharany qolǵa alǵan
2017 jyldyń 1 aqpanynda Úkimet otyrysynda sol kezdegi Úkimet basshysy orynbasary Imanǵalı Tasmaǵambetov «Alashtyń 100 jyldyǵyna durystap daıyndalýymyz kerek. Alashtyń 100 jyldyǵy sol zamanmen qalyp qoımaı, búgingi táýelsiz memleketpen baılanystyrý oryndy bolady», - dep aıtqan edi. Oǵan qazaq tildi BAQ-tar men Alashtanýshylar men Alash qaıratkerleriniń ómir jolyn zertteýshi ǵalymdar da óz úlesterin qosyp jatyr. Ári, Alashorda úkimetiniń 100 jyldyǵyna oraı elimizde túrli deńgeıde ártúrli is-sharalar atqarylyp keledi.
Alash zıalylaryna arnalǵan Qamshy.kz aqparat agenttiginiń kórmesi
Osyǵan oraı Qamshy.kz aqparat agenttigi jyl bastalǵaly 5 is-sharany qolǵa alǵan. Naýryzdyń 5-inde Ahmet Baıtursynuly atyndaǵy murajaı-úıiniń aldynda Alash arystaryna arnap as berdi, 500-ge jýyq adamǵa dastarhan jaıdy. Al sáýirde Ahmet Baıtursynuly saıabaǵyna 100 aǵash otyrǵyzyldy. Onyń jalǵasy retinde 100 jetim bala men áleýmettik jaǵdaıy tómen 100 stýdentke qarjylaı kómek kórsetý úshin 24 qarashada «Alataý» dástúrli óner teatrynda qaırymdylyq konsert uıymdastyrdy. Qamshy.kz aqparat agenttigi jyl sońyna deıin «Alashtyń 100 izbasary» degen atpen elge eńbek etip júrgen memleket qaıratkerleri arasynan 10 adamǵa «Alashorda – 100 jyl» merekelik medalin tabystaıdy.
Jylamasyn sábıler: 100 jetim bala men 100 stýdentke kómek kórsetý
Qaıyrymdylyq keshine ónerpaz Ushqyn Jamalbektiń bastaýymen qurylǵan Ugai prodúserlik ujymy qoldaý kórsetip, atalmysh ujymnyń ánshileri óner kórsetti. Áset Esjan men Oljas Abaıdyń oryndaýyndaǵy Qamshy.kz aqparat agenttiginiń gımni, Bilál Qýanyshtyń sózine jazylǵan «Dúr qamshy» áni keshte otyrǵan ár qazaqty rýhtandyrdy, jigerlendirdi. Buǵan kórermenderdiń uzaq soqqan qoshemeti dálel. Sonymen birge Alashuly etno-toby men Dana Kentaı syndy jas ánshiler qaıyrymdylyq keshine óz úlesterin qosty. Júregi «Alash» dep soqqan ár azamat muqtaj jandarǵa qol ushyn sozýǵa qashan da daıyn qaıyrymdy jandar bılet satyp alýmen qatar, rýhty keshtiń kýási boldy.
Qaıyrymdylyq keshinde óner kórsetý – mártebe
«Búgin «Jylamasyn sábıler» dep atalatyn qaıyrymdylyq keshi ótip jatyr. Almaty ákimdigi, «Qamshy» aqparat agenttigi jáne «Ugai» prodúserlik ortalyǵynyń uıymdastyrýymen ótip jatyr. Kesh 100 jetim bala jáne áleýmettik jaǵdaıy tómen 100 stýdentke arnalady. Qazaǵymnyń jetimi jylamasyn, elimiz tynysh bolsyn», - dedi Ushqyn Jamalbek óz sózinde. Onyń aıtýynsha «Jylamasyn sábıler» atty kesh «Ugai prodution» prodúserlik ortalyǵynyń qoldaýymen uıymdastyrylyp otyrǵan alǵashqy konserti jáne de qadamyn osyndaı ıgi ispen bastaǵanyna qýanyshty.
Keshte óner kórsetken ánshiler ózge keshter men qaıyrymdylyq keshte óner kórsetýdi salystyrýǵa kelmeıtinin aıtady. Qaıyrymdylyq keshiniń sahnasynda óner kórsete otyryp, elge kómegińniń tıgenin seziný ǵajap sezim deıdi jas ánshi Dana Kentaı.
«Mundaı qaıyrymdylyq keshter elimizde qarqyndy damýda. Óner sahnasynda júrgenimen 1 jarym jyldyń júzi bolǵanymen búgingi kúnge deıin on shaqty qaıyrymdylyq keshte óner kórsetip, qoldaý tanytyp kelemiz. Mundaı bastamalardy qashan da qoldaımyn jáne uıymdastyrýshylarǵa úlken alǵysymdy jetkizemin», - dedi Dana Qamshy.kz aqparat agenttiginiń tilshisimen áńgime barysynda.
Elge Ochoou laqabymen tanylǵan Oljas Abaı keshtiń erekshe ótkenine dán rıza boldy.
«Búgin keremet kesh ótip jatyr. Qamshy aqparat agenttigi men Ugai prodúserlik ortalyǵynyń uıymdastyrýymen Alashordanyń 100 jyldyǵyna oraı kesh ótti. Bizden de bir ıgi is bolsyn dep jetim balalarymyzdyń qurmetine uıymdastyryp jatqan jaıymyz bar», - degen Oljas Abaı keshke qoldaý kórsetken qazaq jurtyna alǵys aıtty.
«Sábılerin, jetimin jylatpaǵan qazaqtyń urpaǵy retinde osyndaı sharalarǵa atsalysyp, óner kórsetý – men úshin úlken mártebe», - dedi Ugai prodúserlik ujymynyń múshesi, ánshisi Áset Esjan.
Alashorda úkimetiniń 100 jyldyǵyna oraı jyl bastalǵaly eki márte jeke keshterin ótkizip úlgergen «Alashuly» tobynyń jigitteri Qamshy.kz aqparat agenttiginiń ujymyna, basshylyǵyna zor alǵystaryn bildirdi.
«2017 jyl Alashorda úkimetiniń qurylǵanyna 100 jyl toldy. Bul bar qazaq úshin aıtýly mereke. Bul merekege oraı elimizde túrli is-sharalar atqarylyp keledi. Sonyń basym kópshiligine atsalysqan bizdiń maqtan tutatyn tilshilerimiz, aǵa-qaryndastarymyz Qamshy.kz aqparat agenttiginiń ujymyna alǵysymyzdy bildiremiz. Alashordanyń 100 jyldyǵy dep 100 aǵash otyrǵyzý, as berý, 100 jetim bala men 100 stýdentke kómek kórsetý syndy ıgi sharalardy ótkizip keledi. Osyndaı bastamalaryńyz alǵa bassyn! Alashordanyń 100 jyldyǵyna atsalysqan Qamshy.kz portaly men Alashtyń uldary árdaıym birgemiz», dedi Alashuly etno-tobynyń jigitteri.
Stýdentter men jetim balalardyń qýanyshy hám alǵysy
Alash týy astynda kún sóngenshe sónbeıtin qazaqtyń jetimi jylamaýy tıis, qınalǵan jan ózine kómektesýge daıyn baýyrynyń bar ekenin sezýi, bilýi kerek. Iá, bir ujym bar qazaqtyń jetimin asyraı almas, kómekke muqtaj baýyrynyń bárine birdeı járdemdese almas... Alaıda sál de bolsyn kómegim tıse degen nıetti alǵa tartqan Qamshy.kz aqparat agenttigi elimizdiń 100 jetimi men kómekke muqtaj 100 stýdentine járdemdesýge kúsh saldy. «Bir jyrtyǵyn jamaýǵa jarar» aqshalaı kómek usynyp, júzine kúlki uıalatý – maqsaty boldy. Buǵan kómek alǵan balaqaılar men stýdentterdiń qýanyshynda shek joq, alǵystaryn tókti.
Stýdent Atola Quralaı Qamshy portalynyń jańalyqtaryn únemi oqyp otyratynyn aıta ketip, ujym basshylyǵyna rızashylyǵyn jetkizdi. Ári 200 balaǵa kórsetilý kerek kómektiń bir ushy ózine tıgenine zor qýanyshyn jetkizdi.
Birneshe jyl boıy ulyna áke de, ana da bolyp kelgen Dáýlet aǵa balasyna anasynyń ornyn joqtatpaýǵa tyrysyp keledi. Bar tapqan qarjysy páteraqy men komýnaldyq qyzmetten aspaı, uly Islamnyń aldynda ishki qınalysyn jasyryp júrgen ýaqytta Qamshy portalynan usynylǵan aqshalaı kómek er adamnyń eńsesin kóterip jibergen. Ádemi keshti tamashalaýmen qatar, ulynyń qystyq kıimin alýǵa aqsha tabyla qalǵan Dáýlet aǵa ujymǵa degen sheksiz alǵysyn bildirip, tek alǵa basýyn tiledi.
«Qamshy» ujymy jetim balalarǵa kómek kórsetip jatyr. Kómektiń bir ushy maǵan da tıdi. Alla razy bolsyn! Ótkizip jatqan keshterińiz úlken jaqsylyqtyń bastaýy bolsyn. Saýaby molynan bolsyn! Jarymnan aıyrylǵaly ulymdy jalǵyz ómirip kelemin, onyń qıyn ekenin sózben aıtyp jetkize almaımyn. Ulymnyń anasyn izdegeni bylaı tursyn, keıde kıerge kıim tappaı jatatyn kezder bolady. Týystarymyz anda-sanda kómek kórsetedi, alaıda árkimniń óz otbasy bar, óz máselesi óz basyna jetedi. Al endi qys ta taıady, kúrteshe men qalyń aıaq kıim alý kerek bolǵan kezde, Qamshy ujymynan aqshalaı kómek kórsetemiz degen sózdi estidim. Suraǵanym kókten túse qaldy. Qamshyǵa sheksiz alǵys bildiremin, eńbekterińiz jana bersin», - dep sóıledi jalǵyzbasty áke.
Uly men kelininen aıyrylǵan Zeınesh ájeı nemerelerin ózi asyrap baǵýda. Hat tanyǵaly tek gazet oqyp kelgen ájeı buryn-sońdy «Qamshy» saıty jaıly habarsyz bolǵanyn aıtty. Alaıda bul shara ózine belgisiz aqparat agenttigi jaıly jaqsy pikir qalyptastyrýyna sebep bolyp, endigi jerde saıt oqyrmany atanǵanyn aıtyp, kúldi.
«Keshke jaqyn nemerelerimniń telefonynan «Qamshy» saıtynyń jańalyqtaryn qarap shyǵam. Qaraǵan saıyn ıgi isterin eske alyp, kózime jas ta keledi. Zor alǵysymdy bildiremin. 200 balaǵa birdeı kómek kórsetý ekiniń biri jasaı beretin is emes. Bilýimshe, saıtqa nebári 5 jyl tolǵan eken. Soǵan qaramastan osyndaı úlken sharany qolǵa alǵan ujymǵa belesterdi baǵyndyrsyn deımin. Eki nemeremniń qystyq kıimderi sizderdiń arqalaryńyzda túgendeldi», - degen Zeınesh ájeıdiń janarynan qýanyshtyń jasy tógildi.
Abyroımen ótken aıtýly shara...
Ánshileri de, bıshileri de Alash úshin óner kórsetken kesh abyroımen ótti.
Kesh sońynda Qamshy.kz aqparat agenttiginiń jetekshisi Bilál Qýanysh jetim balalar men muqtaj stýdentterdiń ókilderine 2 mıllıon teńgelik eki sertıfıkat tabystady.
«Álemdegi bar qazaqtyń Otany – Táýelsiz Qazaqstan. Búgingi beıbit elimiz kókten túsken joq. Alash arystarynyń qanymen, janymen, tánimen kelgen. Biz Alash dep sóıleımiz, Alash dep án aıtamyz, Alash dep jyr jazamyz. Bári durys, degenmen bir naqty is bolsa da jasaıyq degen nıetpen búgingi isimiz 100 jetim bala men 100 muqtaj stýdenttiń júregine úmit uıalatyp, Alash arystarynyń rýhynan tálim alyp jatsa, bizdiń armanymyzdyń oryndalǵany. Osy iske at salysyp otyrǵan barlyqtaryńyzǵa tek qana rahmet aıtamyz. Bir aıta keterligi, Qamshy aqparat agenttigi qurylǵaly beri 5 jylda jasalǵan sharalardyń eshqaısysyna biz memleket tarapynan bir tıyn qarajat alǵan joqpyz. Ony tek ózderińiz sıaqty arda azamattardyń kómegimen jasap otyrmyz. Endeshe máńgilik elimiz bolýy úshin barlyǵymyz judyryqtaı jumylyp Táýelsiz Qazaqstan úshin qyzmet ete bereıik», — dedi Bilál Qýanysh.
Qaıyrymdylyq keshtiń shymyldyǵy «Men seni súıemin, Qazaqstan» ánimen jabyldy. Aıta keteıik, keshke Almaty qalasynyń ákimdigi qoldaý bildirdi.
Bárine ortaq bir maqsat – qazaqtyń búgini úshin qan tókken, janyn pıda etken alash arystarynyń esimin máńgi etý, ózine úlgi ete otyryp, bolashaq urpaqqa dáripteý. Júregi alashshyl, ári eli men jeriniń birligin, ultynyń qamyn kúıttegen azamattar barda Alashtyń týy qulamaıdy, jetimi jylamaıdy.
Gúlim JAQAN
Foto: Ádilet Rahmetolla
