Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta Palata «Jer qoınaýy jáne jer qoınaýyn paıdalaný týraly» Qazaqstan Respýblıkasy Kodeks jáne oǵan ilespe zań jobalaryn ekinshi oqylymda maquldady dep habarlaıdy Qamshy.kz aqparat agenttigi QR Parlamenti Májilisi Apparatynyń Baspasóz qyzmetine silteme jasap. 

Osyǵan oraı, óz pikirin ortaǵa salǵan Májilis Tóraǵasy: -Bul Kodekstiń eń negizgi ereksheligi – ol osy jer qoınaýy salasyndaǵy barlyq suraqtar bir qujattyń ishinde jınaqtalǵan. Sonyń nátıjesinde, jer qoınaýyn paıdalanýshylar úshin de, ınvestorlar úshin de tıimdi jaǵdaı jasalatyn bolady,-dedi.

Aıta ketetin bolsaq, Kodeks jobasy jer qoınaýyn paıdalaný salasyn retteýdiń jańa tásilin kózdeıdi. Onda jer paıdalaný quqyǵyn «birinshi keldiń – birinshi aldyń» qaǵıdaty boıynsha berýdiń avstralıalyq modelin engizý, paıdaly qazbalar qorlaryn esepteýdiń halyqaralyq júıesine kóshý, geologıalyq aqparattyń qoljetimdiligin qamtamasyz etý, jer qoınaýynyń memlekettik qoryn basqarý baǵdarlamasyn ázirleý, ýrandy, kómir qabattarynyń metanyn ıgerýdi retteý, paıdaly qazbalardy starateldik óndirýdi engizý sıaqty jańalyqtar qamtylǵan.