Qyrǵyzstan prezıdenti Sooronbaı Jeenbekov Qazaqstan prezıdenti Nursultan Nazarbaevpen kezdesip, kelissóz ótkizýdi josparlap otyr. Azattyqtyń Qyrǵyz redaksásynyń habarlaýynsha, Jeenbekov bul týraly Máskeýde Reseı prezıdenti Vladımır Pýtınmen kezdesý qorytyndysy boıynsha jýrnalıserge aıtty.
"Erteń Mınskide Ujymdyq qaýipsizdik sharty uıymy (UQSHU) memleketteriniń basshylary jınalady. Onda Qazaqstan prezıdenti Nursultan Ábishuly da bolady. Otyrys bolady. Otyrys kezinde barlyǵymen kezdesemin. Men Nursultan Ábishulymen kezdesip, kelissóz júrgizemin jáne bul másele jóninde de sóılesemiz dep úmittenemin" dedi Qyrǵyzstan prezıdenti.
Qazaqstan prezıdentiniń baspasóz qyzmeti nemese Qyrǵyzstan prezıdentiniń baspasóz qyzmeti eki prezıdenttiń kezdesetini jaıly ázirge qandaı da bir aqparat taratpady.
Qazaqstan 10 qazannan bastap Qyrǵyzstanmen shekarada tekserýdi kúsheıtip, tekserý jáne ótkizý beketterinde kólik jáne adam kezegi kóbeıgen. Astana tekserýdiń kúsheıtilgenin kontrabandamen kúres sharasy dep ataıdy. Biraq resmı Bishkek Qazaqstan jaǵy shekarada qoldan kedergi jasap otyr dep biledi.
29 qarashada Sooronbaı Jeenbekov prezıdent retindegi alǵashqy saparynda Reseıge bardy. Ol Máskeýde Reseı prezıdenti Vladımır Pýtınmen jáne premer-mınıstri Dmıtrıı Medvedevpen kezdesti. Jeenbekov 30 qarashada Mınskige baryp, UQSHU-nyń kezekti sesıasyna qatysady.
