Búgin Mınskide Nursultan Nazarbaev aıyrqalpaqty aǵaıynnyń jańa Prezıdentimen júzdesip, eki jaq ortaq mámilege keldi. Kezdesý qyrǵyz basshysynyń ótinishimen ótti. Bul týraly 24.kz habarlaıdy. Ujymdyq qaýipsizdik sharty uıymy samıtiniń qarsańynda qos kóshbasshy baýyrlas eki el arasyndaǵy yntymaqtastyq máselelerin pysyqtady. Shekaradaǵy jaǵdaıdy túzetý úshin arnaıy Jol kartasy ázirlenedi. Birneshe kúnniń ishinde Qyrǵyzstannyń úkimettik delegasıasy Astanaǵa kelip, oǵan qol qoıady dep josparlanýda. Odan keıin qyrǵyz basshysynyń ótinishi boıynsha Qordaı shekarasy ýaqytsha ashylmaq. Buǵan jaýapkershilikti Sooronbaı Jeenbekov óz moınyna alyp otyr. Elbasy qyrǵyz basshysyn saılaýda jetken jeńisimen quttyqtap, Qazaqstanǵa resmı saparmen kelýge shaqyrdy.
Nursultan Nazarbaev: Biz jańa kelistik. Eki eldiń arasyndaǵy týysqandyq-baýyrlyq qatynastyń barlyǵyn ornyna keltiremiz. Ol eki halyqtyń múddesi. Shekarada bolǵan jaǵdaıdyń ne úshin bolǵanyn bárimiz bilemiz. Sondyqtan biz bylaı dep kelistik. Jol kartasy bar. Eki memleket, eki úkimet kelisken. Sol Jol kartasyn qaraý úshin erteń, bir kúni bir úkimet pen Qazaqstanǵa keledi. Bizdiń toppen ekeýi otyrady da soǵan qol qoıady. Sodan keıin Sooranbaı Sharıpovıchtiń suraýy boıynsha biz ýaqytsha qordaı shekarasyn ashamyz da, biraq ta eki jaqtan baqylaý qoıamyz. Qazaqstannan da, Qyrǵystannan da. EAEO-den úsh adam árbir júkti qaraıdy, biraq ótkize beretin bolady. Sondaıdy biz Qytaıdyń shekarasynda da jasaımyz.
Sooronbaı Jeenbekov, Qyrǵyz Respýblıkasynyń Prezıdenti: Biz qurmetti Nursultan Ábishulymen sóılestik. Men raqmet aıttym, meni quttyqtaýy boıynsha. Men Nursultan Ábishulyna da densaýlyq tileımin. Bizdiń baýyrlas qazaq eline jaqsylyqtar qalaımyn. Bolǵan problemalar boıynsha kóp sóılestik. Sheshimge keldik. Jol kartasy bar, eki úkimet ony isteıdi. Jeltoqsannyń aıaǵynda shyǵaramyz. Odan keıin kóp másele sheshiledi. Shekaradaǵy máseleni sheshtik. Men suradym, bul problemalardyń bári sheshiletin problemalar, sodan keıin shekarany ashyp berdi. Men jaýapkershilik alyp otyrmyn. Kóp máseler bar, ony eki taraptan sheshemiz. Raqmet, Nursultan Ábishuly,-dedi ol.
- Tabysty bol! Qyrǵyzstan halqyna aq tilegimnen basqa esh nárse joq. Bir týǵan elmiz. Ómirde bola beredi. Anaý bolady, mynaý bolady. Onyń barlyǵyn artqa tastaıyq. Bir nárseni keshirmeseń, ol adammen taǵy da qarym-qatynasyń bolady degen sóz. Keshirseń, jabylady, -dedi Elbasy..
