Astanalyq turǵyn Aslan Ospanov Qazaqstan Respýblıkasy prezıdentiniń rezıdensıasy Aqordanyń maketin jasap shyqty, dep habarlaıdy Qamshy.kz aqparat agenttigi.
Bul kúnde Aqordanyń maketin jasaǵandar az emes, alaıda bul jolǵy makettiń ereksheligi - Aqorda ózgeshe stılmen - 60 myńnan astam jyltyraǵan áshekeı tastarmen jasalǵan. Maketke qarap kúndizgi jáne túngi Astananyń kórinisin kóre alamyz, ári ishinen elimizdiń gımni de shyrqalyp turady.
Aqordany jasaýǵa Aslannyń 1 jyldan astam ýaqyty ketken. Budan buryn jarnama agenttiginde jumys istegen jas sáýletshi sońǵy bes aıyn tek Aqordanyń maketin jasaýǵa arnaıdy. Sol úshin jumysynan da shyǵyp ketken. Esesine Aslannyń jary men ata-anasy oǵan qarjylaı da, psıhologıalyq jaǵynan da qoldaý bildirip, kómek kórsetedi. Mektepti de, ýnıversıtet qabyrǵasyn da Astana qalasynda támamdaǵan Aslannyń mamandyǵy – sáýletshi.
Astana Qazaqstannyń astanasy bolǵaly bas qaladaǵy qurylys barysy Aslannyń kóz aldynda ótken. Qalaǵa erekshe ásemdik beretin kózdiń jaýyn alatyn záýlim ǵımarattar Aslannyń sáýletshi bolamyn degen armanynyń týýyna sebep bolady.
Ol úshin jas Astanada boı kótergen aspanmen astasqan ǵımarattardyń bári ádemi boldy. Alaıda kóńiline erekshe unaǵany, dızaınyna asa qyzyqqan bir ǵımarat – Aqorda rezıdensıasy. Jastaıynan Aqordanyń erekshe stıldegi, erekshe dızaındaǵy maketin jasasam degen armany Aslannyń kókeıinde qalyp qoıdy.
Sóıtip bir jyl buryn armanyna qol jetkizýdegi alǵashqy qadamyn bastap ta ketti. Aqordanyń maketin jasaý úshin Almatydan 60 myńnan astam áshekeı tastar satyp alǵan.
Usaq tastarmen úlken maket jasap shyǵarý úshin úlken tózimdiliktiń keregi belgili. 1 jyl boıy kóz maıyn tamyzyp, bar jumysyn ysyryp qoıyp jasaǵan eńbeginiń sátti shyqqanyn baıqaýǵa bolady.
Aslannyń aldaǵy maqsaty – Elbasymen kezdesip, Aqordanyń maketin prezıdentke óz qolymmen tapsyrsam deıdi.
Búgin Qazaqstan Respýblıkasynyń tuńǵysh prezıdenti kúni. Sondaı-aq Aslan Ospannyń da týǵan kúni. Týǵan kúnde ár adam ómirinde oryn alar bir ǵajaıypqa senedi. Aslan da sondaı bir ǵajaıyp ornap, Elbasynyń qabyldaýyna iliksem degen nıetin jasyrmady.
Aslannyń jary, qoldaýshysy Nurtilek Rıanbek eriniń eńbegin joǵary baǵalady:
«Ekiniń biriniń qolynan kelmeıdi, tózimi de jetpeıdi. Uıyqtamaı kúni-túni eńbektendi. Eńbektenýge turatyn dúnıe dep oılaımyn. Eń basty tilegim – Elbasyna tapsyrsam degen armany oryndalsa eken. Aslannyń eńbegi men tózimdiligimen men de, ata-anasy da maqtanamyz», - dedi Nurtilek hanym.
Nurtilek Rıanbektiń aıtýynsha, búgingi tańda maketke qyzyǵýshylyq tanytyp, satyp alýǵa nıet bildirgender de bar.
«Elbasy Aslandy qabyldaýy da, qabyldamaýy da múmkin. Eger bolashaqta maket úıde bolyp, onyń eńbegine saı úlken qarjy usynyp, satyp alamyn degender bolsa, satýǵa qarsy emespiz», - deıdi sáýletshiniń jary.
Al Aslannyń aldaǵy ýaqyttaǵy jospary – úlken jobalardy qolǵa alyp, tapsyrystar qabyldaý, maketter jasaý.
