Tájik-aýǵan shekarasynda bolǵan atys saldarynan Tájikstannyń Hatlon oblysy Shamsıddın-SHohın aýdanynda ornalasqan áskerı bólimniń komandıri polkovnık Haırıddın Ahtamov qaza taýyp, tórt áskerı qyzmetker aýyr jaralanǵan, dep jazady Qamshy.kz aqparat agenttigi azattyq.org saıtyna silteme jasaı otyryp.
Azattyqtyń Tájik qyzmetine (Ozodı) bolǵan jaıttan habary bar adamnyń aıtýynsha, qarýly qaqtyǵys ótken túni Langýrıho aýylynyń mańynda bolǵan.
Jaralanǵandardyń úsheýin Sarıchashma aýyldy aımaǵyndaǵy aýrýhanaǵa, bireýin Voseı aýdanynyń aýrýhanasyna jatqyzǵan. Eki jaraly qyzmetkerdi Dýshanbege tikushaqpen jetkizýge ázirlep jatqany habarlandy.
Bılik oryndary bul oqıǵaǵa baılanysty ázirge resmı aqparat taratqan joq. Ozodıge aqparat bergen adamnyń sózinshe, oqıǵa bolǵan jerge kúsh qurylymdarynyń qyzmetkerleri barǵan.
Tájikstan men Aýǵanstan shekarasynyń jalpy uzyndyǵy - 1400 shaqyrym. Oqıǵa bolǵan shekara mańynda zańsyz esirtki tasymaldaýshylar jáne qarýly kontrabandıstermen qaqtyǵystar jıi bolyp turady. Jyl saıyn shekaranyń bul tusynda ony zańsyz kesip ótýge baılanysty ondaǵan oqıǵa tirkeledi.
