«Sıfrlyq Qazaqstan» memlekettik baǵdarlamasy QR Prezıdenti Nursultan Nazarbaevtyń qaraýyna usynylady. Bul týraly búgin Úkimet otyrysynda atalǵan baǵdarlama talqylanǵannan keıin Premer-Mınıstr Baqytjan Saǵyntaev aıtty, dep habarlaıdy Qamshy.kz aqparat agenttigi.
«Ózderińizder bilesizder, «Sıfrlyq Qazaqstan» memlekettik baǵdarlamasynyń jobasy qyrkúıek aıynda Elbasyna tanystyrylǵan bolatyn. Elbasynyń tarapynan birqatar syn-eskertpeler aıtyldy. Osynyń barlyǵy búgin bizge usynylyp otyrǵan baǵdarlamada ornyn taýyp, qorytyndysy shyǵaryldy», - dedi Baqytjan Saǵyntaev.
Onyń aıtýynsha, atalǵan baǵdarlamany engizýdiń nátıjesindegi búgingi kúngi ekonomıkalyq tıimdilik 2,2 trln teńgeni quraıtyn bolady. Onyń kórsetkishteri aldaǵy ýaqytta joǵarlaıtyndyǵyna esh kúmán joq.
«Sol sebepti aıtylǵan sharýalardyń barlyǵyn iske asyrý úshin birqatar mınıstrlik tarapynan is-sharalar atqarylýy qajet. Birinshi kezekte Aqparat jáne komýnıkasıalar mınıstrligi múddeli memlekettik organdarmen jáne uıymdarmen birlesip, bir aı merzimniń ishinde memlekettik baǵdarlamany uıymdastyrý boıynsha is-sharalardyń tyńǵylyqty josparyn jaýapty tulǵalar men júzege asyrý merzimin kórsete otyryp ázirlep, bekitýi qajet. Ekinshiden, Aqparat jáne komýnıkasıalar mınıstrligi ókiletti memlekettik organdarmen birge bıznes úshin de, halyq úshin de keshendi aqparattyq túsindirý sharalaryn aıqyndaýy tıis», - dedi Úkimet basshysy.
Sonymen qatar Premer-Mınıstr elimizdiń Ulttyq ekonomıka mınıstrligine memlekettik baǵdarlama aıasyndaǵy sharalardyń júzege asyrylýyna jarty jyldyq sapaly monıtorıń júrgizýi tıistigin basa aıtty.
«Búgin ádisterin qoldaýdy usynamyn jáne Memleket basshysynyń kelisýine jiberý qajet. Maquldanǵannan keıin biz atalǵan baǵdarlany bekitemiz jáne kelesi jyldan bastap qabyldanǵan sheshimder aıasynda júzege asyrýdy bastaımyz», - dedi Saǵyntaev.
Búgin Úkimet otyrysynda qaralǵan «Sıfrlyq Qazaqstan» baǵdarlamasynyń Qazaqstanǵa berer paıdasy týraly brıfıń barysynda aqparat jáne komýnıkasıalar mınıstri Dáýren Abaev, «Zerde» UAKH basqarma tóraǵasy Rýslan Eńsebaev, qarjy mınıstrliginiń memlekettik kiris komıteti tóraǵasynyń orynbasary Arǵyn Qypshaqov aıtyp berdi.
Aqparat jáne komýnıkasıalar mınıstri Dáýren Abaevtyń aıtýynsha, «Sıfrlyq Qazaqstan» baǵdarlamasynda 12 maqsatty ındıkator qarastyrylǵan. Eń bastylarynyń biri — ártúrli salalarda 2022 jylǵa qaraı 20%-dan 30%-ǵa deıin ósetin eńbek ónimdiligi. 2022 jylǵa qaraı jalpy bólshek saýda kóleminde elektrondy saýda úlesi 2,6% quraıdy. Osy kezeńde sıfrlandyrý esebinen 300 myńǵa deıin jumys orny ashylady. Elektrondy túrde usynylatyn memlekettik qyzmetterdiń úlesi memlekettik qyzmetterdiń jalpy kóleminiń 80%-na deıin ósedi. 80-nen astam paıyzǵa halyqtyń sıfrlyq saýattylyq deńgeıi artady.
«Bıylǵy Joldaýynda Elbasy Qazaqstannyń úshinshi jańǵyrýy aıasynda ekonomıkanyń jedel tehnologıalyq damýyn qamtamasyz etý mindetin alǵa qoıǵany belgili. Damyǵan jáne serpindi elderdiń ozyq tájirıbesi IT-salasyn damytý memlekettik saıasattyń basym strategıalyq baǵyty bolýy qajet ekenin kórsetti. Osyǵan saı Aqparat jáne komýnıkasıalar mınıstrligine «Sıfrlyq Qazaqstan» Memlekettik baǵdarlamasyn ázirleý tapsyrylǵan bolatyn. Mınıstrlik buǵan deıin Memleket basshysy aıtqan máselelerdi qarastyra otyryp, búgingi kúni baǵdarlamanyń sońǵy, qorytyndy nusqasyn ázirlep, nazarlaryńyzǵa usynyp otyr», - dedi ol.
Sonymen qatar aqparat mınıstri atalǵan baǵdarlamany daıyndaýǵa sheteldik sarapshylar tartylǵanyn atap ótti.
«Baǵdarlamany daıyndaýǵa sheteldik jáne jergilikti sarapshylar keńinen tartyldy. Sheteldik sarapshylar retinde Dúnıejúzilik bank, Boston consulting group, Gartner jáne taǵy basqa kompanıalar qatyssa, Qazaqstannan «Atameken» Ulttyq kásipkerler palatasy, IT kompanıalar asosıasıasy jáne Internet qaýymdastyǵy úlesin qosty. Sonymen qatar, barlyq memlekettik organdar belsene atsalysty», - dedi Dáýren Abaev.
Osy oraıda ol «Sıfrlyq Qazaqstan» baǵdarlamasynyń basqa salalardyń damýyna serpin beretinin tilge tıek etti.
«Elbasy atap ótkendeı, sıfrlyq ındýstrıany damytý barlyq salalarǵa serpin beredi. Osy oraıda, Jahandyq sıfrlyq ekojúıede bolyp jatqan ózgeristerdi eskere otyryp, Qazaqstannyń ekonomıkasyn sıfrlandyrý bastamasynyń ómirlik mańyzy zor bolmaq. Memleket basshysynyń tapsyrmasy boıynsha, «Sıfrlyq Qazaqstan» memlekettik baǵdarlamasynyń mátinine ony júzege asyrý bóligi boıynsha birqatar tolyqtyrýlar engizildi. Osylaısha, baǵdarlama 2018 jyldan 2022 jyldarǵa deıingi kezeńdi qamtı otyryp, el ekonomıkasynyń tehnologıalyq jańǵyrýyna serpin bermek. Sonymen qatar, eńbek ónimdiliginiń uzaqmerzimdik ári aýqymdy ósimi úshin jaǵdaı jasaýy tıis», - dedi vedomstvo basshysy.
Bızneske baǵdarlamanyń paıdasy men artyqshylyqtary týraly Rýslan Eńsebaev baıandap berdi. Onyń aıtýynsha, shaǵyn jáne orta bıznes sıfrlandyrýdy engizýden úlken paıda kóredi. Baǵdarlamada SHOB-ty yntalandyrý sharalary, kásipkerlikke óz betimen jumys isteıtinderdi jáne shaǵyn kásipkerlerdi tartý qarastyrylǵan. SHOB-ke qyzmet kórsetýdiń Biryńǵaı terezesin qurý da belgili-bir qolaıly jaǵdaılar jasaıdy. Shaǵyn kásipkerler úshin AT quraldarynyń negizgi paketi jasaldy jáne t.b.
Kedendik baqylaý men salyq salasyn sıfrlandyrý aıasynda «Blokcheın tehnologıasyn qoldaný arqyly QQS ákimshiliktendirý» jobasyn engizý josparlanyp otyr.
Arǵyn Kypshaqov jańa tehnologıalarǵa negizdelgen ortalyqtandyrylmaǵan bazany qalyptastyrý salyq tóleýshilerdiń qarjy operasıalarynyń tizbegin jyldam qadaǵalaýǵa jáne olarǵa QQS kepildendirilgen qaıtarymyn júzege asyrýǵa múmkindik beretinin aıtty.
Blokcheın tehnologıalaryn paıdalaný mynalardy:
- «sur» syzbalardy paıdalaný múmkindiginiń bolmaýyn;
- janama salyqtardy basqarýdyń qarapaıymdylyǵyn;
- salyq tóleýshilerge esepke alý men esep berýdiń ońaılyǵyn qamtamasyz etedi.
Qazirgi tańda Qarjy mınıstrligi «ITP» DKQ-men birlesip, QQS ákimshiliktendirý ádistemesin ázirleý jáne blokcheın tehnologıany qoldaný arqyly aqparattyq júıege qoıylatyn tehnıkalyq talaptardy ázirleý boıynsha jumystaryn bastady.«Aldaǵy jyldyń qyrkúıek aıyna deıin ol tolyqtaı daıyn bolady, al 2019 jyldyń 1 qańtarynan bastap júıege kóshý josparlanyp otyr», — dep jýrnalıserdiń blokcheın tehnologıalaryn engizý merzimi týraly suranyqtaryna jaýap bere otyryp, A. Qypshaqov sózin túıindedi.
Sondaı-aq ken óndirýshi 14 kásiporynǵa ekonomıkany sıfrlandyrý boıynsha ınovasıalyq modelder engiziledi. Osy aqparattardy ataǵan Aqparat jáne komýnıkasıa mınıstrliginiń ókili «Sıfrly Qazaqstan» baǵdarlamasy 5 baǵytta júretinin jetkizdi. Jyl sońyna deıin qujatty bekitý kózdelgen. Sondyqtan búgingi basqosýda sheteldik irgeli ınovasıalyq kompanıalarmen osy saladaǵy jemisti jobalar talqylandy.
Baǵdarlamany iske asyrýdyń bes negizgi baǵyty:
«Ekonomıka salalaryn sıfrlandyrý»;
«Sıfrlyq memleketke kóshý»;
«Sıfrlyq Jibek jolyn iske asyrý»;
«Adam kapıtalyn damytý»;
«Inovasıalyq ekojúıe qurý».
Otyrysta máseleni qaraý aıasynda «Zerde» UBH basqarma tóraǵasy Rýslan Eńsebaev, sarapshy Sergeı Perapechka sóz sóıledi, sondaı-aq, taqyrypqa qatysty Premer-Mınıstrdiń orynbasary Asqar Jumaǵalıev túsinikteme berip ótti. Máseleni qaraý qorytyndysy boıynsha Úkimet «Sıfrlyq Qazaqstan» baǵdarlamasynyń usynylǵan jobasyn qoldady.
