Búgin Májilis Tóraǵasy Nurlan Nyǵmatýlın Fınlándıanyń Qazaqstandaǵy Tótenshe jáne Ókiletti elshisi Mıkko Kıvıkoskıdi qabyldady, dep jazady Qamshy.kz aqparat agenttigi.

Taraptar ekijaqty qarym-qatynasty, sonyń ishinde, parlamentaralyq yntymaqtastyqty nyǵaıtýdyń ózekti máselelerin talqylady.

Májilis Spıkeri elshini jańa qyzmetke taǵaıyndalýymen quttyqtap, endi birneshe kúnnen keıin Sýomıdiń 100 jyldyq mereıtoıy atalyp ótiletindigin alǵa tarta kele, fın halqyna gúldený men baq-bereke tiledi. Sonymen birge, osy jyly eki el arasynda dıplomatıalyq qarym-qatynastyń ornaǵanyna 25 jyl toldy. Spıker atap ótkendeı, Fınlándıa Soltústik Eýropa elderiniń ishinde alǵashqylardyń biri bolyp, Qazaqstannyń táýelsizdigin moıyndady. Osy ýaqyttar ishinde qos memleket basshylarynyń salıqaly saıasatynyń arqasynda Qazaqstan men Fınlándıa Ortalyq Azıa men Soltústik Eýropadaǵy strategıalyq áriptesterge aınaldy. 

Májilis Spıkeriniń pikirinshe, atalǵan memleket barlyq deńgeıde syndarly únqatysýǵa qol jetkizgen Qazaqstannyń syrtqy saıası jáne ekonomıkalyq áriptesi.

Óz kezeginde elshi myrza Qazaqstannyń tabystaryna óte joǵary baǵa berip, bizdiń elimizdiń ekonomıkalyq saladaǵy tájirıbesi álemdegi birqatar elderge úlgi ekenin jetkizdi.

Taraptar Qazaqstanda ótken EKSPO halyqaralyq kórmesine aıryqsha nazar aýdaryp, bul eki eldiń baılanysyna jańa serpin beretindigine toqtaldy.