Almaty memlekettik bıznes kolejiniń akt zalynda Elbasy N.Nazarbaevtyń «Bolashaqqa baǵdar: rýhanı jańǵyrý» maqalasyna oraı merekelik is-shara ótti, dep jazady Qamshy.kz aqparat agenttigi.
Merekelik konsertke ánshi, sazger Marat Omarov, jazýshy, Dıdahmet Áshimhanuly atyndaǵy ádebı birlestiktiń tóraǵasy Nurdáýlet Aqysh jáne taǵy basqa qonaqtar qatysty. Kesh Marat Omarovtyń «Arý qala – Astana» ánimen ashyldy. Ánshi bul ándi qyzy Bıbimarıammen birge oryndady. Búkil Qazaqstanǵa tanymal óner qaıratkerine stýdentter dý qol shapalaqtap qoshemet kórsetti.
Marat Omarov tek án aıtýmen shektelmeı, kolej basshylyǵyna, onyń dırektory Gúlfaırýz Qasymovaǵa osyndaı kesh uıymdastyryp jatqany úshin alǵys aıtyp, aqjarma tilek arnady. «Gúlfaırýz Qabdenqyzy talaı mádenı is-sharalardyń basy-qasynda júrgen kisi. Astana qalasy endi aıaǵynan endi turyp jatqan shaqta, sol qalanyń mádenı jumystaryna muryndyq bolyp, qansha irgeli jumystar atqardy. Mine, endi osy kisiniń arqasynda ıgi jumystar Almatyda jalǵasyn taýyp otyr. Gúlfaırýz hanym elimizdiń rýhanı jańǵyrýyna on bes-jıyrma jyldan beri qyzmet etip keledi» dedi ol.
Bul merekelik is-sharanyń basty ereksheligi – ony atalǵan oqý ornynyń jas mamandary uıymdastyrdy. Mysaly, konsertti kolej oqytýshylary Aınur Tasýbaeva men Aıdar Kúntýbaı júrgizse, basqa oqytýshylar Elbasynyń maqalasyna oraı ózderiniń baıandamalaryn oqydy, jas mamandardyń bir toby sahnada án aıtyp, bı bıledi.
Kesh barysynda sóz alǵan jazýshy, Dıdahmet Áshimhanuly atyndaǵy ádebı birlestiktiń tóraǵasy Nurdáýlet Aqysh rýhanı jańǵyrýda kitap oqýdyń paıdasy zor ekeni týraly aıtty. «Kitap oqý bizdi rýhanı baıytatyn negizgi qural. Sebebi kitap bizdi babalamyz qaldyryp ketken muralarmen sabaqtastyrady. Sondyqtan, jastardy árkez kitap oqýǵa baýlýymyz kerek» dedi jazýshy.
Merekelik is-sharany Almaty memlekettik bıznes kolejiniń dırektory Gúlfaırýz Qasymova qorytyndylady. Ol keshke qatysqan barlyq qonaqtarǵa alǵysyn bildirip, olarǵa oqý ornynyń atynan azdaǵan tartý-taralǵy jasady.
Jasulan Naýryzálıev
