Altyn satatyn dúkenge birde kishkentaı qyz kiredi. Jasy 6-7 jas shamasynda. Kire sala sóredegi áshekeılerden kóz almaıdy. Bir mezgilde izdegenin tapqandaı alaqaılap jiberedi. Sosyn satýshy jigitke qarap:
— Keshirińiz, maǵan aannnaaý marjan monshaqty ádemi qorapqa salyp beresiz be?-deıdi.
Satýshy balaqaıǵa kúmánmen qarap:
— Qansha aqshań bar? Aqshań bar ma ózi? Bul anaý-mynaý emes, 200.000 turady...
Qyz bala jalma-jan qaltasynan túıinshektelgen oramaldy alyp, ishinen tıynyn sanaı bastaıdy.
— Mynaý jetip qalar, ıá? Bilesiz be, búgin ápkemniń týǵan kúni edi. Anamyz kóz jumǵaly beseýmizdi baǵyp júr. Sebebi ákem beseýmizdi anam qaıtqasyn tastap, basqa apaıǵa ketip qalǵan edi. Sodan beri ápkem kúni-túni jumys istep bizdi qarap júr. Aqshasy ylǵı ózine jetpeı qalady. Sondyqtan búgin ony qýantqym keledi. Mynaý bar jıǵan aqsham. Oǵan osy qońyr monshaq ádemi kózderine keremet jarasar edi,-dep súıkimdi qyz bir ýys tıynyn jigittiń alaqanyna ustata salady.
Satýshy jigit oılanyp turdy da, sosyn monshaqty alyp ádemi qorapshaǵa salyp, syrtyn bantıkpen ádemilep orap beredi.
— Má!-dep balaqaıǵa qorapty ustatady, — Tek saq bol! Qolyńnan túsirip alma!
Qýanǵan qyz syılyqty alyp quldyrańdap úıine qaraı júgiredi.
Jumys ýaqyty aıaqtalarda dúkenge 18 jas shamasynadaǵy boıjetken kiredi.
— Mm, keshirińiz, myna monshaq osy jerden satyp alynǵan ba?-deıdi qorapty kórsetip.
Dúken ıesi birden túsine qoıady.
— Iá.
— Meniń dúkendegi zattardyń baǵasy-ol klıentimizben aradaǵy qupıa. Ol qupıany aıta almaımyn.
— Biraq meniń sińilimde 200-aq teńge bolatyn. Al myna monshaq-taza marjan, baǵasynyń qymbat ekenin bilemin. Men bir jyl jumys istesem de tóleı almaıtyn shyǵarmyn...
Dúken ıesi qorapty alyp, bantıgin qaıta ádemilep, boıjetkenniń qolyna ustatady:
— Sizdiń sińlińiz úlken adam isteı almaıtyndy istedi, sóıtip monshaqty eń qymbat baǵaǵa aldy. Sebebi ol ózinde bardyń bárin berdi... Dúkende bir sát tynyshtyq ornap, boıjetkenniń kózinen bir tamshy jas ytqyp shyqty. 
Al dúken ıesi, ıaǵnı jigit boıjetkenniń sulýlyǵyna súısine qarap turdy.