Qazaq-qyrǵyz shekarasyndaǵy ahýal turaqtala bastady, dep jazady Qamshy.kz aqparat agenttigi.
Qos memleket prezıdenteriniń kelisiminen keıin ile-shala kedendegi júk kólikteriniń uzyn-sonar kezegi kúrt azaıǵan. Biraq bul shekaradaǵy tekseris osymen bitedi degen sóz emes. Aldymen Qyrǵyzstan taýarlaryn Eýrazıalyq ekonomıkalyq odaqtyń talaptaryna saı rásimdeýi tıis. Ázirge resmı Bishkek bárin oryndaımyz dep ýáde etken. Al shekaranyń burynǵy qalypta jumys isteýi aldymen saıasattan alys qarapaıym halyqty qýantyp otyr. Bul týraly KTK jańalyqtary habarlaıdy.
Bul qazaq-qyrǵyz shekarasyndaǵy Aısha bıbi beketi. Burynǵydaı qarbalas pen uzyn sonar kezek joq. Beketten óte almaı, qańtarylyp turǵan júk kólikteri de kórinbeıdi. Shekaradaǵy shekteý azaıyp, jurt ary-beri jyldam ótip jatyr. Buǵan ásirese, oqshaýda qalǵandaı kúı keshken aıyrqalpaqty aǵaıyn máz.
Jeńisbek Atabekov, Qyrǵyz azamaty:
-Endi jaqsy boldy. 5-10 mınýtta ótip kettim.
–Buryn qalaı edi?
–Buryndary taza qıyn bolyp qaldy ǵoı. Aptalap jatty ǵoı balalar.
Saıera Saıdýmanova, Qyrǵyz azamaty:
–Iá, biraz jeńildedi ǵoı. Jaqsy bolyp qaldy.
Bekettegi qarbalastyń saıabyrsýy beker emes. Ótken jumada eki eldiń prezıdentteri Belorýs astanasy Mınskide shekara boıynsha kelisimge kelgen edi. Sol kezde Nursultan Nazarbaev shıelenisti retteý úshin jol kartasy ázirlenetinin aıtqan. Kóp uzamaı qyrǵyz úkimetiniń músheleri Astanaǵa ushyp kelip, qaıta kelissóz júrgizýge májbúr boldy. Biraq bizdiń úkimettiń qyrǵyz áriptesterine qoıǵan birneshe mindeti bar.
-Jol kartasyna qol qoıylǵannan keıin biz kedendik, salyqtyq, veterınarlyq, jáne fıtosanıtarlyq baqylaýdy ádettegideı talaptarǵa saı júrgizetin bolamyz. Qyrǵyzstan taraby atalǵan talaptardy muqıat oryndaýǵa mindetteme aldy. Onyń ústine Qazyq-qyrǵyz shekarasyndaǵy ahýaldy Eýrazıalyq ekonomıkalyq komısıa ókilderi de qadaǵalaıdy, - QR Premer-mınıstriniń birinshi orynbasary Asqar Mámın.
Al resmı Bishkek Eýrazıalyq odaqtyń talaptaryn endi buzbaýǵa ýáde berip otyr. Sondyqtan Qazaqstan «jol kartasyn» qabyldap, shekaradaǵy shekteýdi azaıtqan. Endigi másele Qyrǵyzstannyń sol moıyna alǵan mindetterin qalaı oryndaıtynynda bop tur. Sebebi bizdiń elge sózinde turatyn senimdi saıası seriktes qajet. Negizi qazaq-qyrǵyz shekarasyndaǵy daý eki aı buryn bastalǵan. Óıtkeni, qudaıy kórshimizdiń kásipkerleri Eýrazıalyq ekonomıkalyq odaqtyń kóptegen talaptaryn buzdy. Tipti, Qytaıdan aǵylatyn kontrabandany aıtpaǵanda, jalǵan deklarasıa toltyryp, salyqtan jaltarǵany anyqtalǵan edi. Osydan soń Qazaqstanda tekseristi barynsha kúsheıtýge májbúr boldy.
-Biraq bul Qazaqstan shekarasyn aıqara ashyp tastaıdy degen sóz emes. Júk kólikteri men taýarlardyń aınalymy burynǵysynsha tekserile beredi. Al qos eldiń Úkimetteri arasyndaǵy kelisim aldymen qyrǵyzdarǵa óte paıdaly. Óıtkeni búdjetine túsetin kiris qaıta kóbeıedi.
