"Baıtaq mekenim" qoǵamdyq qorynyń bastamasymen Reseı astanasy Máskeýde aqıyq aqyn Tólegen Aıbergenovtyń 80 jyldyǵyna oraı "Bir toıym bar..." atty ádebı-sazdy kesh ótti. Mańǵystaýlyq bir top azamat bastaǵan sharanyń Reseıdiń bas qalasynda ótýine qol ushyn sozǵan Máskeýdegi Halyqtar dostyǵy men ulttyq mádenıetterdiń damýyn qoldaýdyń "Astana" qory jáne Almaty qalasynyń ákimdigi bolatyn.  

Tvorchestvalyq keshke júzden astam poezıa súıer qaýym jınaldy. Olardyń qatarynda ulttyq mádenı ortalyqtardyń ókilderi, joǵary oqý oryndarynyń oqytýshylary men Máskeýde bilim alyp jatqan qazaq stýdentteri bar. Mádenı shara qazaq jáne orys tilderinde ótti. Sahna tórinde aqynnyń óleńderi oqylyp, birneshe áni shyrqaldy. Atap aıtqanda, QR Eńbek sińirgen qaıratkeri, ánshi Sáýle Janpeıisova jáne "Aqtóbe" gazetiniń bas redaktory Baýyrjan Babajanuly, tanymal ánshi Roza Álqoja jáne aqynnyń qyzdary Saltanat, Mahabbat, Qusnı, Aınar jáne taǵy basqa poezıa súıer qaýym sóz sóıledi. Al keshke jınalǵan qonaqtar qol soǵyp, qoshemet kórsetti.    

"Baıtaq mekenim" qoǵamdyq qorynyń tóraǵasy Sábıt Toqymbetovtyń aıtýynsha, aqynnyń shyǵarmashylyǵyn zertteýdi qolǵa alý maqsatynda ótken jyly 22 aqpanda Aqtaý qalasynda bastaý alǵan "Ata jurtyn ańsaǵan Aıbergenov" atty birinshi ǵylymı-teorıalyq konferensıa ótkizilip, sol jyly qazan aıynyń 14-shi juldyzynda Shymkent qalasynda bir top Shymkenttik kásipkerlerdiń qoldaýymen «Tólegen Aıbergenov ańsaǵan álem» atty halyqaralyq ǵylymı-tájirıbelik konferensıamen jalǵasqan. Sondaı-aq, "Aq jol" jastar qanatymen birlesip ońtústik astanamyz Almaty shaharyndaǵy Jazýshylar odaǵyndaǵy ádebıetshiler úıinde "Tólegen Aıbergenov poezıasy jáne qazirgi zaman" atty úshinshi halyqaralyq ǵylymı-tájirıbelik konferensıasyda joǵary dárejede ótkizilgen. Aqtaý men Shymkentte ótken konferensıanyń materıaldary kitap bolyp shyqsa, Almatyda ótken konferensıa týraly tolyqqandy maǵlumat jýyq arada jańa kitap bolyp shyǵady dep kútilýde. Sonymen qatar, "Baıtaq mekenim" qoǵamdyq qory  Tólegen Aıbergenovtiń 80 jyldyǵyna oraı 80 estelik medal shyǵarǵan. Medal ıegerlerine Máskeý qalasynda qor tóraǵasy Sábıt Toqymbetov bastap tabystady. Endi alda aqynnyń 80 jyldyǵynyń qorytyndy keshi Astana qalasynda ústimizdegi jyly 22 jeltoqsanda ótedi dep josparlanyp otyr. Astana tórindegi Ulttyq kitaphanada qalǵan medal ıegerlerine saltanatty túrde tabystalmaq.   

"Tólegen Aıbergenovtyń esimi el jadynda máńgi saqtalyp qalary sózsiz. Qaı qalaǵa barsaq ta, aqynǵa degen qurmet erekshe. Osyndaı aýqymdy shara bıyl Aqtóbe oblysy Baıǵanın aýdanynda ótken edi. Sonymen qatar, Besqalanyń Nókis qalasyndaǵy Berdaq atyndaǵy ýnıversıteti men Ájınıaz atyndaǵy pedagogıkalyq ınstıtýtynda, aqynnyń kindik qany tamǵan "Tań nury" aýylynda da shyǵarmashylyq kesh ótti. Sharaǵa tanymal aqyndar Qasymhan Begmanov jáne Baýyrjan Babajanuly men aqynnyń urpaqtary túgel qatysty. Bul rette T.Aıbergenovtiń shyǵarmashylyǵyn nasıhattaýda Qońyrat aýdanyndaǵy Tólegen Aıbergenov atyndaǵy orta mektep dırektory Jetkizgen Sársenbaev degen azamattyń eleýli úles qosqanyn aıtyp ótkenimiz jón bolar", - deıdi "Baıtaq mekenim" qoǵamdyq qorynyń tóraǵasy Sábıt Toqymbetov.

Sondaı-aq, belgili bolǵandaı aqynnyń keıbir óleńderi buǵan deıin orys tiline aýdarylsa, bıyl Túrkıalyq ǵalym Oǵyz Doǵan túrik tiline, Bulbul Mataı qytaı tiline, Bahodır Ýbaıdýllaýǵly ózbek tiline aýdarýdy qolǵa alǵan.  

Aldaǵy ýaqytta Shymkent qalasynda Tólegen Aıbergenov atyndaǵy ǵylymı-zertteý ortalyǵyn ashý josparlanyp otyr. Bul bastamany Ońtústik Qazaqstan memlekettik pedagogıkalyq ýnıversıtetiniń rektory Ońalbaı Aıashevtyń ózi qoldaǵan. Iaǵnı, "Tólegentaný" ǵylymı-zertteý ortalyǵy arqyly aqynnyń ómiri men shyǵarmashylyǵyn tereń zertteý kózdelgen. Tólegentaný ortalyǵy ashylar bolsa, oǵan qoldaý kórsetetin jandar óte kóp. Osy bastamany buqaralyq aqparat quraldarynda qaıta-qaıta kóterip júrgen Taraz memleketik pedagogıkalyq ýnıversıtetiniń janynan qurylǵan "Baýyrjantaný" ǵylymı-zertteý ortalyǵynyń qyzmetkeri, pedagogıka ǵylymdarynyń magıstri Álimbaı Amanbaıuly Naızabaevty erekshe atap ótý qajet.

     Tólegen aqynnyń óleńderin oqı otyryp, onyń ózine arnalǵan óleńder jınaǵy birneshe ese kóp ekenin ańǵarýǵa bolady. Kózi tirisinde zańǵar jazýshy marqum Ábish Kekilbaev "Bizdiń qolymyzda qalǵan bir-eki juqa kitap – T. Aıbergenov talantynyń shalqar darıasy emes, asaý arnanyń basy ǵana edi. Onyń kók telegeı kól bolyp shalqýyn kórýdi taǵdyr bizdiń mańdaıymyzǵa jazbapty" dese, adýyndy aqyn Temirhan Medetbektiń "Telegeı teńiz tebirenisterdiń aqyny" atty kólemdi maqalasy respýblıkalyq buqaralyq aqparat quraldaryna shyqty. Al mańǵystaýlyq aqyn Sabyr Adaı bolsa, "Tólegen Aıbergenov - ulttyq rýhtyń bul buly, qarlyǵashy" degen bolatyn. Sondaı-aq, Qadyr Myrza Áli, Farıza Ońǵarsynova, Muhtar Shahanov, Syrbaı Máýlenov jáne Seıfolla Ospan syndy óner salasynyń maıtalmandary da aqynǵa talaı óleń arnaǵanyn el jaqsy biledi.  

Sonymen qatar, Tólegen Aıbergenov atyndaǵy syılyqtyń laýreaty Svetqalı Nurjanov, aqyn, "Janartaý" qoǵamdyq birlestiginiń jetekshisi Anar Shamshadınova jáne Ázirbaıjan Qonarbaev, Tólegen aqynnyń óleńderin nasıhattaýda áli de bolsa atsalysýda. Buǵan qosa "Aqerke Jaıyq" ánin aıtpaǵanda, ánshi Tamara Asardyń oryndaýyndaǵy Tólegen Aıbergenovtyń sózine jáne Shámshi Qaldaıaqovtyń ánine jazylǵan "Jańǵyrǵan Mańǵystaý" týyndysyn erekshe atap ótýge bolady. Bul rette osy ándi únemi oryndap, mádenıet salasynda kóp jyldar boıy ter tógip júrgen Shetpe turǵyny Ábil Jumaǵazıevtyń da talantyn eskermeı ketýge bolmaıdy. Jalpy, tek aqyndardy alatyn bolsaq, bıylǵy 2017 jyl Tólegen Aıbergenovke arnaldy desek artyq aıtpaǵan bolar edik. Eń bastysy, el arasynda osyndaı sharalardyń joǵary deńgeıde ótýine ýaqyt taýyp, qoldaý kórsetip júrgen jandarǵa alǵystan basqa aıtarymyz joq.

Nurbol Oqýov