Germanıada otandastarymen kezdesýi kezinde Qyrǵyzstannyń tuńǵysh prezıdenti, 2005 jylǵy qyzǵaldaq revolúsıasy nátıjesinde bılikten ketirilgen Asqar Aqaevqa jumyrtqa laqtyrǵan. Bul oqıǵadan túsirilgen vıdeo áleýmettik jelilerde tarady dep habarlaıdy Qamshy.kz aqparat agenttigi Azattyqtyń Qyrǵyz qyzmetine silteme  jasap.

Kyrgyz Club Germany uıymdastyrǵan otandastarmen kezdesýge Asqar Aqaev zaıyby Maıram jáne qyzy Bermetpen birge barǵan. Kezdesýge kelgenderdiń keıbiri Aqaevtyń munda kelgenine narazy bolǵan. Qatysýshylardyń biri eks-prezıdentten qyrǵyz tilinde sóıleýdi talap etken. Aqaev oǵan Germanıa tárizdi demokratıalyq elde júrgendikten qalaǵan tilinde sóıleıtinin aıtyp jaýap bergen.

Vıdeoda kezdesýge qatysqan birneshe adamnyń "Aqaev ket!" degen jazý ustap turǵany kórinedi. Asqar Aqaev suraqtarǵa jaýap berýden bas tartyp ketýge yńǵaılanǵan sátte sol jerde turǵan er adamdardyń biri oǵan jumyrtqa laqtyrǵan. Munan soń álgi adam men Bermet Aqaeva sózge kelip qalǵan. Bul oqıǵaǵa sol mańda turǵan polısıa qyzmetkerleri aralasyp, eki tarapty da sabasyna túsirgen.

Sharany uıymdastyrǵan Kyrgyz Club Germany qaýymdastyǵynyń basshysy Baqyt Kóbegenov jumyrtqa laqtyrǵan adamdy tanymaıtynyn aıtyp, onymen polısıa áńgime ótkizetini týraly habarlaǵan.

2005 jylǵy naýryzdaǵy revolúsıada keıin Askar Aqaev otbasymen birge Máskeýge qashyp barǵan. Qazir ol sonda ǵylym salasynda jáne oqytýshy bolyp eńbek etedi. Aqaevtan keıin Qyrǵyzstanda bılik basyna kelgen Qurmanbek Bakıev 2010 jyly sáýirdegi revolúsıa nátıjesinde bılikten bas tartyp, shetelge qashýǵa májbúr bolǵan. Ol qazir Mınskide turyp jatyr. Bakıevti bılikten qýǵan soń Qyrǵyzstandy ýaqytsha úkimet basqaryp, Roza Otýnbaeva ótpeli kezeń prezıdenti bolyp taǵaıyndalǵan. 2011 jyly Roza Otýnbaeva bılikti jalpyhalyqtyq saılaý arqyly prezıdent qyzmetine jańadan saılanǵan Almazbek Atambaevqa ótkizgen. Konstıtýsıaǵa sáıkes, alty jyldyq qyzmet ókileti aıaqtalǵannan keıin Atambaev bıylǵy prezıdent saılaýynda jeńiske jetken Sooronbaı Jeenbokevke bılikti tapsyrǵan.