Ánshi Qaırat Nurtas halyq ártisi Eskendir Hasanǵalıevke alǵys aıtty. Eskendir Hasanǵalıev osyǵan deıin Qaırat Nurtastyń "Aýyrmaıdy júrek" ánin otandyq telearnalardyń birinde oryndaǵan edi.

"Qazaq ónerindegi shoqtyǵy bıik sańlaq Eskendir aǵamnyń meniń repertýarymdaǵy ándi oryndaýy men úshin úlken mártebe. Eskendir aǵa, muny sizdiń asqan kishipeıildigińiz, keńdigińiz, kóregendigińiz, artyńyzdan ergen býynǵa jasaǵan qamqorlyǵyńyz dep bilemin", - dedi ánshi Instagram jelisindegi paraqshasynda.

Sonymen qatar, Qaırat Nurtas sońǵy ýaqytta óz tarapyna syn aıtqandar jaıly da pikirin jetkizdi. Onyń pikirinshe, Hasanǵalıevtiń "Aýyrmaıdy júrek" ánin aıtýy ánshige shabyt syılaǵan.

"Keı jandardyń eńseńdi túsirgisi keletin syndarynan keıin sizdiń áreketińiz qanat bitirip, shabyt syılady. Alla razy bolsyn sizge!", - dep jazdy Qaırat Nurtas.

Eske sala keteıik, buǵan deıin respýblıkalyq basylymdardyń birine bergen suhbatynda KSRO halyq ártisi Bıbigúl Tólegenova Qaırat Nurtasty darynsyzdyǵy úshin synap, qazirgi estradada sol sıaqty "birkúndik juldyzdardyń" tolyp ketkenin aıtqan edi.

Budan keıin Qaırat Nurtas Tólegenovanyń synyna jaýap berdi. "Bilesiz be, ol kisiniń meni tanıtynynyń ózine qýanyshtymyn. Árkimniń óz pikiri bar. Neshe túrli jaǵdaı bolady. Men onyń sózderine ókpelemeımin. Kerisinshe, ol kisini anamdaı kóremin. Ony sheksiz qurmetteımin", - degen edi

Derekkóz: Baq.kz