"Qyzýqandy, kóp sóıleıtin adamdy "aýzyna shaıtan túkirgendeı" dep atasa, úıdegi kishkentaı balaǵa qonaqtyń kózi ótpeýi úshin odan jerge túkirýin ótinedi" dep jazady saıt.
Odan bólek, aspanǵa, aıǵa, shańyraq pen qudyqqa túkirýge tyıym salady.
"Alaıda, bir qyzyǵy adamnyń aýzyna túkirýge ruqsat etken. Árıne, bul jerde úlken adamdar emes, kishkentaı sábılerdiń aýzyna kóp túkirtedi. Budan júzdegen jyldar buryn sábıdiń ata-anasy tanymal aqyn, mýzykant, batyr, bı nemese abyroıly aqsaqaldan balanyń aýzyna túkirýdi suraǵan", - delingen saıttaǵy jazbada.
Osy oraıda ata-ana balasynyń da abyroıly, tanymal bolǵanyn qalaǵan.
"Tipti, balanyń aýzyna túkirtý úshin alys jolda artqa tastap barǵan ata-analar da bar. Keıin osy isterin aıtyp, qonaqtaryna maqtanǵan da. Osydan soń, sábıi darynsyz bolmaıdy dep eskertip otyrady", - dep jazady saıt.
Bul dástúr burynyraqta a jıi qoldanylǵanymen, bizdiń zamanymyzda da umyt qalǵan joq. Ǵalamtordan tanymal tulǵalardyń da aýzyna túkirgenin bilýge bolady.
"Tanymal ǵalym Beısenbaı Kenjebaevtyń aýzyna dańqty aqyn Maǵjan Jumabaev túkirgen. Ataqty kúıshi-kompozıtor Nurǵısa Tilendıev qazirgi tanymal ánshi Meırambek Bespaevqa túkiripti", - delingen saıtta.
Ánshi Baǵdat Sámedınova men jazýshy Marhabat Baıǵut ta ózderine "aýyzǵa túkirip ber" dep jıi ótinish aıtylatynyn jasyrmaǵan.
"Meniń bir dosym óz tanymaldyǵyn bala kezinde ataqty ánshiniń túkirgenimen baılanystyrady. Siz de ata-anańyzdan osy týraly surap kórińiz", -dep oıyn túıindeıdi avtor.
Atalǵan saıtqa baılanysty tanymal jýrnalıs Ǵalym Boqash ta óz pikirin bildirdi.
"Osynda "balanyń aýzyna túkirý" saltyn jaqtap, ıa aıyptap pikir talastyrǵan dostarym: "Bireýdiń silekeıi aýzyńa túsip ketse, sol adamnyń DNQ-sy deneńe sińip ketedi, tabıǵatyńnyń bir bólshegine aınalyp ketedi" degen tujyrym aıtyp qalypty. Eriksiz oıyma qumsaǵyzdy kezektesip shaınaǵan, jalǵyz "átesh" muz kámpıtti jabylyp jalaǵan, Coca Cola-ny bir bótelkeniń aýzynan bólip ishken jáne basqa da túrli jaǵdaılarda baıqamaı, ıa baıqap silekeı almasqan zamandastarym esime túsip ketti", - deıdi ol.
"Men biletin ǵylymı faktiler bul máseleni kishkene basqashalaý sıpattaıdy. Adamnyń terisinen bastap, ishegine deıin belgili bir ýaqyt aralyǵynda kletka deńgeıinde tolyq jańaryp turady. Bylaısha aıtqanda jylyna birneshe márte fızıologıalyq turǵydan alǵanda "jańa adamǵa" aınalamyz. Sol sebepti "ishtegi bir vagon adam" týraly oı jańsaq, árqaısysy shelektep túkirgen bolsa da", - degen jýrnalıs óziniń Facebook jelisindegi paraqshasynda. Sýret avtory: Ańsaǵan Mustafa, gonzo.kz
"Nur.kz"
