Adamjegish Nıkolaı Jumaǵalıevtiń 1990 jyly Aqtóbede jep qoıǵan qurbany týraly derek qandy oqıǵadan 24 jyl ótken soń, 2014 jyly ashylǵan bolatyn.

Jaqynda kannıbaldyń qolynan ajal bolǵan Aınagúl Aqbısenovanyń aǵasy Járdem Aqbısenov jergilikti aktobetimes.kz basylymyna suhbat berip, atyshýly oqıǵanyń óz otbasylaryna qalaı áser etkenin aıtyp berdi.

"Qaryndasym aıýandyqpen óltirilgen kezde men Almatyǵa issaparǵa ketken edim. Oqıǵany estip, dereý oraldym. Gorkıı kóshesindegi (qazirgi Asaý Baraq) úıge kelip, onyń bólshektelgen denesin kórgende, jyndanyp ketetin shyǵarmyn dep oıladym", - dep eske alady Járdem.

Ol sol oqıǵadan soń 3-4 aı boıy uıyqtaı almaı, qorqynyshty túster kórgenin, al qaryndasyn musylmansha kıizge oramaı, tabytqa salǵanyn aıtty.

"Tabytqa salýǵa týra keldi. Óıtkeni, onyń denesin qanisher bólshektep tastaǵan. Bul jaǵdaı bárinen buryn ákeme qatty aýyr tıdi", - deıdi ol.

Járdemniń aıtýynsha, qyzynyń aýyr qazasynan soń ákesiniń kózi kórmeı, soqyr bolyp qalǵan. Aqyry qaıǵysy ishine túsip, kóz jumǵan. Al qart anasy búginge deıin Oıyl aýdanynda turyp jatyr.

"Biz 11 balaly otbasydan edik. Men úlkenimin. Qaryndasym aqkóńil, jaıdary bolatyn. Kózderi úlken ári kógildir, sulý edi. Ádebıet pen kórkemsýretti súıetin. Mektep kezinde onyń artynan talaı jigittiń júgirgenin kórdim. Keıin medısına fakúltetine túsip, aýrýhanada qosymsha jumys istep, otbasymyzǵa kómektesip júrdi", - dep eske alady Járdem Aqbısenov.

Járdemniń aıtýynsha, sol túni qaryndasy túngi aýysymǵa túsýi kerek bolǵan. Alaıda qurbysy qonaqqa keletin bolǵasyn, suranyp ketipti. Úıden 200 metr jerdegi aıaldamaǵa qurbysyn shyǵaryp salǵan kezinde ony adamjegish Jumaǵalıev baıqaǵan da, tún ortasynda Aınagúl turatyn úıge basyp kirgen.

"Biz talaı baqsy-balgerge baryp edik. Sonyń ishinde bireýiniń ǵana boljamy kelip otyr. Ol qyzdy qandyqol adam óltirdi, aldaǵy ýaqytta kim ekenin biletin bolasyzdar dep aıtqan", - deıdi Járdem.

Sol oqıǵadan keıin Járdem Aqbısenov Almaty qalasyna kóship ketipti.

Nur.kz