18 jastaǵy Nazerke Áripti óltirgen Qurban Isqakovty 21 jylǵa bas bostandyǵynan aıyrdy, dep habarlaıdy Zakon.kz InAlmaty.kz-ke silteme jasap.
Sot otyrysy aýdanaralyq arnaıy mamandandyrylǵan qylmystyq ister jónindegi sotta jabyq túrde ótti.
«Úkim shyǵaryldy, biraq biz isti apelásıaǵa beremiz. Ol ótken joly da merzimin tolyq ótemegen. Úlgili tártibi úshin erte bosatqan. Osy joly da solaı bolmasqa kim kepil beredi», - dedi Nazerkeniń anasy Sáýle Sarbaeva.
Anasynyń aıtýynsha, aıyptalýshy tek «Adam óltirý» baby boıynsha sottalǵan, «Zorlaý» baby qoldanylmaǵan. Dálel joq dep eskermegen.«Qandaı dálel kerek. Eki aıdan keıin qyzymnan eshteńe qalmaǵan», - dedi ashynǵan ana.
Eske sala keteıik, 18 jastaǵy Nazerke Árip 10 shilde kúni iz-tússiz joǵaldy. Almaty oblysyna qarasy Tuzdybastaý aýylyndaǵy úıinen shyǵyp, qaıta oralmaǵan. 4 qyrkúıekte qyzdyń denesi tabyldy.
