Qazaqstandyq bıznesmen, Qazaqstannyń Reseıdegi elshisi Imanǵalı Tasmaǵambetovtiń kúıeýbalasy Keńes Raqyshev Reseıdiń altyn óndiretin Petropavlovsk kompanıasy ıegerleriniń biri atandy dep habarlady Reuters agenttigi. BAQ 38 jastaǵy Keńes Raqyshev kásiporyn úlesin reseılik mıllıarder Vıktor Vekselbergtiń Renova Group kompanıasynan satyp alǵanyn habarlady, dep jazady Qamshy.kz aqparat agenttigi.
Renova Group kompanıasy Reuters agenttigine Petropavlovsk kompanıasy aksıasynyń 22 paıyzyn satyp alý kelisimi aıaqtalǵanyn rastaǵanymen, onyń mán-jaıy týraly aıtýdan bas tartqan.
«Interfaks» agenttigi Keńes Raqyshevtiń reseılik kompanıa aksıasyna ózi qadaǵalaıtyn kıprlik Fincraft Holdings Ltd. Fırmasy arqyly ıe bolǵanyn habarlady.
Reuters-tiń málimetinshe, Petropavlovsk kompanıasynyń naryqtaǵy kapıtaly bıyl 8 paıyzǵa (331 mıllıon dollarǵa deıin) ósken. Reseıdegi eń iri altyn óndiretin kompanıalardyń biri sanalatyn Petropavlovsk-niń bas keńsesi Londonda ornalasqan. Kompanıa Reseıdiń Qıyr Shyǵysy men Amýr oblysyndaǵy altyn kenishterin ıgeredi.
Qazaqstandyq Forbes jýrnaly Keńes Raqyshevtiń baılyǵyn 705 mıllıon dollarǵa baǵalaıdy. Basylym málimetinshe, Raqyshev SAT & Company óndiristik holdıńi aksıasynyń baqylaý paketine ıe. Onyń Standard saqtandyrý kompanıasynda, Central Asia Metals Plc metalýrgıalyq kompanıasynda jáne tranzaksıa qyzmetin kórsetetin NetElement kompanıasynda úlesi bar. Raqyshev bıyl Kazkommersbanktegi 86,09 paıyz aksıa paketin «Halyq bankine» 1 teńgege satqan.
Keńes Raqyshev ár jyldary Qazaqstan premer-mınıstri, qorǵanys mınıstri, Almaty ákimi, prezıdent ákimshiliginiń jetekshisi bolyp qyzmet atqarǵan 61 jastaǵy Imanǵalı Tasmaǵambetovtiń qyzy Ásel Tasmaǵambetovaǵa úılengen. Tasmaǵambetova 2017 jyly aqpanda Qazaqstannyń Reseıdegi elshisi bolyp taǵaıyndalǵan.
