Ulttyq arna basshysy Erlan Qarın áleýmettik jelide qyzý talqyǵa túsken "Qozy Kórpesh-Baıan sulý" telehıkaıasyna qatysty pikir bildirdi, dep habarlaıdy Qamshy.kz aqparat agenttigi.
Erlan Qarın óz pikirin Facebook áleýmettik jelisindegi jeke paraqshasynda jazdy.
"Kesheli beri «Qozy Kórpesh-Baıan sulý» telehıkaıasy jaıly pikirlerińizdi kórip, estip jatyrmyz. Unatyp jatqandar da, unatpaı jatqandar da bar. Degenmen, ózimizdiń otandyq teleónimniń shyǵyp, osyndaı rezonans týdyrtyp, telehıkaıaǵa degen úlken qyzyǵýshylyq tanytyp jatqandyǵy qýantady. Sebebi, qanshama jyldar boıy otandyq telearnalarda sheteldik telehıkaıalardyń sany basym bolyp keldi. Endi, mine kórermenderge óz ónimderimizben shyǵyp jatyrmyz. 2009 jyldan beri bizdiń korporasıa 80-ge jýyq otandyq telehıkaıany kórermen nazaryna usynypty. Biz bul jumysty áli de jalǵastyrýdamyz. Bıylǵy jyldyń ózinde melodrama, drama, tarıhı nemese ekshn janrlaryndaǵy telehıkaıalardy túsirýdi qolǵa aldyq. Qazirgi maqsatymyz kórermenge ár túrli janrdaǵy kontent usyný.
«Qozy Kórpesh-Baıan sulý» telehıkaıasyna kelsek, árıne kemshilikter bar, belgili bir sáıkessizdikterdi de joqqa shyǵarmaımyz. Biraq ta, sonymen qatar, bul kıno emes telehıkaıa ekenin de umytpaǵandaryńyz jón. Jáne de bul óte shaǵyn telexıkaıa. Sondaı-aq, shyn mánisinde televıdenıede nemese kıno salasynda bolsyn tolyqtaı bir sáıkestik bolý kerek degen qatyp qalǵan talap joq. Tipti, álemdik deńgeıdegi ádebı shyǵarmalardy da ekranızasıalaǵanda neshe túrli pikirtalastar oryn alyp jatady. Degenmen osyndaı tarıhı týyndylar kerek. Al oryn alǵan túrli qatelikterdi aldyn alý úshin biz aýtsorsıng kompanıalarmen jumys jasaý tártibin ózgertetin bolamyz, ony jaqynda kelisip qoıǵanbyz, sosyn telehıkaıalardy qabyldaý boıynsha kórkemdik keńestiń jumysyn da qolǵa almaqpyz. Biz sizderdiń barlyq pikirlerińizdi eskerýdemiz. Bolashaqta da kórermender men mamandardyń talaptaryna saı ónim daıyndaýǵa umtylatyn bolamyz.
Al, bizge kelip túsip jatqan ólshemderge sáıkes, bul telehıkaıa jastar arasynda úlken qyzyǵýshylyq týdyrtty jáne kórsetilim deńgeıi óte joǵary kórsetkishterge ıe boldy.
Eń bastysy, aldaǵy ýaqytta odan da qyzyqty jáne sapasy joǵary týyndylar kútip turǵanyn aıta keteıin. Atap aıtqanda, qazaq zıalylarynyń Azattyq úshin kúresi men ómirin beıneleıtin 14 bólimdi «Tarzaman» telehıkaıasynyń túsirilimi aıaqtaldy. Ony aldaǵy jyldyń basynda Sizderge usynatyn bolamyz. Ulttyq arnanyń teleónimderin qarap, úlken qyzyǵýshylyq bildirip otyrǵandaryńyzǵa rahmet!" - dep jazady Erlan Qarın.
