Jańa jyldyń alǵashqy kúninde Desanttyq-shabýyldaý áskerleriniń áskerı qyzmetshisi podpolkovnık Zákir Qarashev budan buryn qylmystyq jaýapkershilikke tartylǵan azamatty qarýsyzdandyryp, polısıa qyzmetkerlerine tapsyrdy, dep habarlaıdy Qamshy.kz aqparat agenttigi QR Qorǵanys Mınıstrliginiń baspasóz qyzmetine silteme jasaı otyryp.

Áskerı qyzmetshiniń aıtýy boıynsha ol qyz balanyń dúnıege kelýine baılanysty dosynyń úıine otbasymen birge qonaqqa shaqyrylǵan bolatyn. Merekeniń naǵyz qyzǵan kezinde esikke qońyraý soǵylady. Páter qojaıyny esikti ashyp, baspaldaq alańyna shyǵady. Kóp keshikpeı páterdegi aıqaı-shý estiledi. Podpolkovnık Qarashev dosynyń artynan shyǵyp, oǵan kezelgen jaýyngerlik tapanshany baıqap qalady. Qaýip-qaterdi oılamaı ofıser beıtanys er adamnyń qolynan qarýdy qaǵyp túsirdi. Biraq, qylmysker kenetten qaltasynan granatany alyp shyqty. Áskerı qyzmetshi ony qolymen qysyp, qoıan-qoltyq urys aıla-tásilin qoldanyp, shabýyl jasaǵan adamnyń qolynan sýyq qarýdy julyp aldy. Er adam ózin agressıvti túrde ustady. Ony polısıa qyzmetkerleri kelgenge deıin baılap tastaýǵa týra keldi. Keıinnen Almaly AİİB-de ustalǵan adamda tapansha men granatadan basqa gaz balony, búktemeli pyshaq jáne 200 dollar somasynda qoldan jasalǵan aqsha bolǵany anyqtaldy. Budan buryn ol urlyq pen buzaqylyq úshin ustalǵan. Tintý barysynda qolǵa túsken adam esikten jańylysqany aıqyndaldy.

«Árıne, meniń boıymdy úreı bıledi, biraq, ózim úshin qoryqqan joqpyn. Men otbasylarymyz úshin alańdadym. Páterde áıelderimiz ben bala-shaǵamyz qaldy. Eger de biz shaqyrylmaǵan qonaqty qarýsyzdandyrmaǵanda, olarǵa úlken qaýip tóner edi», - deıdi podpolkovnık Zákir Qarashev. Bul desantshy áskerı qyzmetshiler arasyndaǵy alǵashqy batyl áreket emes. Esterińizge sala ketsek, byltyrǵy jyly efreıtor Danıar Eshaıdarov óziniń ómirine qaýip tóndire otyryp, avtokóliktiń dóńgeleginiń astynan tas jolda eki jasar balany qutqaryp qalǵan bolatyn. Al kishi serjant Ǵalymjan Álıýhanov órt shalǵan páterdiń ishinen eki balany aman-esen alyp qaldy.