Myna oqıǵalardy oqı otyryp, naǵyz qatigezdik pen soraqylyqqa kýá bolasyń.

Qyz balany «súndetteý» týraly esigenińiz bar ma? Bul – áıel adamnyń syrtqy jynys múshelerin jartylaı nemese tolyq túrde alyp tastaý. Mundaı ota túri baǵzy zamandarda qoldanylǵan. Alaıda, qazirgi tańda Azıanyń keıbir elderi men Taıaý Shyǵys, Afrıka elderinde bul prosedýra áli de óziniń qoldanystaǵy ózektiligin joımaı keledi.

Búgingi kúni osyndaı salt-jorany bastan ótkergen 125 mıllıon áıel bar eken.

Asha Maılz esimdi tanymal fotograf pen jýrnalıs Nadá Pánkova  qatigez salttyń qurbanyna aınalǵan  Gambıa áıelderiniń taǵdary týraly joba jasaǵan. Osy áıelderdiń oqıǵalardyń birsypyrasyn  Qamshy.kz aqparat agenttigi jarıalaǵan bolatyn. Taǵy birneshe áıeldiń basynan ótkenin  oqyrman  nazaryna usynamyz.

Fatý Bodjang, 52 jasta

«Meniń qalaı súndettelgenim esimde joq. Sebebi bul proses sábı kezimde jasalǵan. Bul-dástúr, sondyqtan, anam barlyq ata-analar isteýge tıisti nárseni istedi. Bul prosestiń sábı kezimde jasalǵany jaqsy boldy dep oılaımyn. Sebebi eseıgen saıyn aýyrsynýdy qattyraq sezinesiń. Keıinirek basqa áıelder meni qyzdardy súndetteýge úıretti. 17 jasymnan bastap kishkene qyzdarǵa osy otany jasaı bastadym. Meniń tájirıbemde birde-bir ret qıyndyq týǵan kezder bolmapty. Osydan bir jyl buryn otany jasaýǵa tyıym salynǵan soń, barlyq qural-jabdyqtarymdy jerge kómip tastaýǵa týra keldi. Súndetteýge tyıym salynǵanyna, zańnyń qabyldanǵanyna shyndyǵynda, rıza emespin. Menińshe, biz dástúrimizdi saqtaýymyz kerek. Munda turǵan eshqandaı sumdyq nárse joq. Eger qolyń jeńil bolsa, eshqandaı qıyndyq týmaıdy. Áıel adam úshin otbasy men kúıeýi jylý syılaıdy.  Basqasy- mańyzdy emes»-deıdi áıel.

Emı Sove, 19 jas

«Men 3 jasta bolǵan kezde súndetteldim. Sondyqtan saltanatty rásimniń qalaı ótkeni esimde joq. Tek keıin boıjetken soń ǵana qandaı sumdyqty bastan ótkergenimdi bildim. Mektepte de, teledıdarda da bul otanyń durys emes ekenin aıtatyn. Qazir munyń tyıym salynǵanyna qýanamyn. Ózimniń de densaýlyǵymmen qıyndyqtarym bar. İshim aýyrady, al ózimnen keıingi sińilim kishi dáret kezinde qınalady. Sol úshin aılap mektepke barmaıtyn. Osy jaǵdaılardan keıin anam basqa sińililerimdi súndetteýden bas tartty. Ázirge turmys qurý týraly oılamaımyn.

Bolashaǵym úshin qorqamyn. Kúıeýimmen baqytty bolamyn ba degen suraqtar mazalaıdy. Menińshe, kez kelgen áıel jaqsy er adamǵa, jaqsy kúıeýge laıyqty. Men eshqashan mundaı qylmysty óz qyzdaryma jasamaspyn».