Semeıde kondýktor jolaýshyny avtobýstan qýyp shyqty, - dep habarlaıdy Tengrinews.kz. Oqıǵanyń vıdeosy áleýmettik jelide taralyp ketti.  Vıdeoda qyzdyń kondýktordy sońǵy aıaldamaǵa deıin jetkizip tastaýdy surap turǵanyn kórýge bolady. Alaıda áıel adam "Bizde obed" degen jeleýmen jolaýshynyń túsip qalýyn talap etken.  Buǵan narazy bolǵan Semeı turǵyny áleýmettik jelide munyń alǵashqy oqıǵa emestigin jazyp, qala ákimi Ermak Sálimovten shara qoldanýdy suraıdy.  Bul jazbaǵa qatysty narazy turǵyndar da pikir bildirip, 16 baǵyttaǵy avtobýstardyń rasynda da osyndaı qıyndyqtary baryn rastady. Jeli qoldanýshylarynyń sózinshe, júrgizýshiler jolaýshylardy sońǵy aıaldamaǵa deıin aparmaıdy. 

Bul oqıǵany bilgen tasymaldaýshy júrgizýshimen kelisimshartty buzyp, jolaýshyǵa dóreki sóılegen kondýktordy jumystan bosatatynyn málimdedi. "Sanatorıı" 16 baǵyttaǵy avtobýstyń sońǵy aıaldamasy emes. Alaıda bul júrgizýshi men kondýktorǵa ondaı quqyq bermeıdi - jolaýshylardyń talaby boıynsha, olar adamdardy jetkizý kerek. Sondyqtan kinámizdi tolyq moıyndaımyz", - deıdi taksomotorly park basshysy.  Al qala ákimdiginiń ókilderi tasymaldaýshynyń áreketin baqylaýǵa alatyndaryn aıtady. "Júrgizýshiniki durys emes. Jetkizip tastap, túski úziliske barý kerek bolatyn. Tasymaldaýshymen kelisim bar. Qazir aýyzsha aıttyq. Ary qaraı shara qoldaný týraly hat joldaımyz", - deıdi jolaýshylar kóligi men avtojoldar bóliminiń ókilderi.