"Otyrar" arnasyndaǵy «Jańa kún» baǵdarlamasynyń qonaǵy Áleýmettik tóleýdi vedomostvoaralyq esepteý ortalyǵynyń OQO fılıaly dırektorynyń orynbasary Nesibeli Qarajanova qazaqstandyqtardyń zeınet jasyna qatysty kóptegen mańyzdy suraqtarǵa jaýap berdi dep jazady Qamshy.kz aqparat agenttigi .
— Jańa jylda barlyq kórsetkishterdiń ósýine oraı zeınetaqy, járdemaqy tólemderi qaıta ındeksteledi. 2018 jyldyń 1 qańtarynan bastap zeınetaqy tólemderi 8 paıyzǵa, qalǵan barlyq áleýmettik tólemder 6 paıyzǵa kóterildi. Memlekettik saqtandyrý qorynan tólenetin tólemder 16 paıyzǵa ósti. Byltyr eń tómengi zeınetaqy kólemi 28 148 teńge bolsa, bıyl 33 745 teńge boldy. Bazalyq zeınetaqy byltyr 12 802 teńge bolsa, 1 shildede 14 466, endi bıyldan bastap 15 270 teńgege kóterilip otyr. Bazalyq zeınetaqy byltyr 45 myń bolsa, 1 qańtardan bastap 49 019 teńgeni quraıdy. Bul eńbek zeınetaqysy men bazalyq zeınetaqyny qosqandaǵy eń tómengi zeınetaqy kórsetkishi. Jumys istep zeınetaqy qoryna aýdarǵan azamattardyki 1 shildede 104 374 teńge bolsa, endi 1 qańtardan bastap eń tómengi aılyq kórsetkishtiń ósýine (2 405 teńge) baılanysty 111 myń teńgeniń esebinen esepteledi. 1 qańtardan bastap áıel azamatshalardyń jasyna baılanysty ózgerister bar. 1960 jyly týylǵan áıelder bolsa, burynǵy zań boıynsha 58 jasta zeınetkerlikke shyqsa, endigi zań boıynsha 58 jas 6 aıda shyǵady. Bıyl 2018 jyldan bastap ár jylda 6 aıǵa kóteriledi de, 10 jyl aǵymynda er kisilermen qatar zeınetkerlikke 63 jasta shyǵatyn bolady. 53 jasta zeınetkerlikke shyǵatyn kóp balaly analar, 1949 jáne 1963 jyl aralyǵynda semeı polıgonynda keminde 5 jyl turǵan azamattar bolsa, áıelder 45 jasta, er kisiler 50 jasta zeınetkerlikke shyǵady. Olarǵa jas kóterilýi qoldanylmaıdy.
— Zeınetaqydan bólek kópbalaly otbasylarǵa, bala kútimine baılanysty dekrettik demalysta otyrǵan analarǵa qosymsha tólem bolady ma?
— Áıel azamatshalar jumys istep, saqtandyrý qorynyń qatysýshysy bolsa júktiligine jáne bosanýyna baılanysty tólenedi. Bir jolǵy járdemaqy jumys istegen, istemegenine qaramastan beriledi. 1 jasqa deıingi bala kútiminde zeınetaqynyń 40 paıyz esebinde beriledi.
