Búgin Almaty qalasynda Muhtar Áýezov atyndaǵy drama teatrynyń dırektory Erlan Biláldiń isine qatysty baspasóz konferensıasy bolyp ótti, dep habarlaıdy Qamshy.kz aqparat agenttigi.
QR Teatr óneri qaýymdastyǵy 1,5 mıllıon teńge kóleminde paramen ustalǵan teatr dırektory Erlan Bilálǵa arasha túsip, búgingi baspasóz konferensıasynda atalǵan oqıǵaǵa qatysty teatr óneriniń ókilderi óz pikirlerin ortaǵa saldy.
Elimizge belgili aktrısa Kúnsulý Shaıahmetova bul jaǵdaıdy ónerge jasalǵan qıanat dep atady.
«Janym aýyryp, býynsyz jerge pyshaq urǵan sátte elim deıtin erdiń arqasyna tıgen qamshysyna arqasyn tóseıtin qandastarynyń joqtyǵy meniń janyma batty. Men eki teatrdan da qýylǵan balanyń birimin, jese taıaqty jegen balanyń birimin. Ónerge qıanat jasalyp jatyr, aǵaıyn, biraq, eshkimdi de tabalamaımyn. Osy jaǵdaıdy estigen kezimde, eki týyp, bir qalǵanym emes, teatrda da keremet jaǵdaıymdy jasady dep aıta almaımyn, biraq men munda shyndyq izdep kelip otyrmyn. Bul – qasaqana ónerge jasalǵan qıanat dep bilemin», - deıdi aktrısa.
Káris teatrynyń dırektory Lúbov Nı qazir Erlan Biláldiń densaýlyǵy syr berip, úıinde jatqandyǵyn aıtty.
Aıta keter bolsaq, M.Áýezov atyndaǵy akademıalyq qazaq drama teatrynyń dırektory Erlan Bilál 1,5 mln teńge para para alǵany úshin ustalǵan bolatyn.
M.Áýezov atyndaǵy akademıalyq qazaq drama teatrynyń dırektory Erlan Bilál óziniń kinásin tolyqtaı moıyndaǵandyqtan qamaýǵa alynǵan joq. Qazirgi ýaqytta sotqa deıingi tergeý jumystary júrgizilip jatyr.
