Álem boıynsha oqylymy eń  joǵary aqparat - kez kelgen eldegi prezıdenttiń taǵdyryna, onyń ómirine qatysty oqıǵa. Árıne, álemde qansha memleket bolsa, sonsha basshysy bary anyq. Sondyqtan barlyǵyn túgendep shyǵý múmkin emes. Degenmen el tizginin ustaǵan biraz jandarǵa qatysty azdy-kópti aqparat berýdi jón kórdik. 

- Fransıanyń burynǵy prezıdenti Nıkolá Sarkozı 2012 jylǵy saılaý aldy naýqanyn qarjylandyrýǵa baılanysty "Bıgmalıon" isi boıynsha sot aldynda jaýap berdi. Tergeý jumystary barysynda anyqtalǵandaı ol paıdalanýy tıis €22,5 mln qarjynyń ornyna €40 mln aqsha jumsaǵan. 

- Estonıa prezıdenti Kerstı Kalúlaıd alaıaqtardyń qurbanyna aınaldy. Alaıaqtar onyń qyzmettik bank kartasyn buzyp, amerıkalyq Ross Stores dúkeninde 2,8 myń eýroǵa saýda jasaǵan. 

- Fransıada el prezıdenti Fransýa Olland sóz sóılep turǵanda polısıanyń myltyǵy baıqaýsyzda atylyp ketip, oq daıashy men bir qyzmetkerge tıdi. 

- Al hakerler osy prezıdenttiń Facebook akkaýntyn buzyp, onyń paraqshasyna 7 mamyrǵa belgilengen «Fransýa Ollandtyń otstavkaǵa ketýi qurmetine uıymdastyrylǵan kesh» atty is-sharaǵa shaqyrý jarıalaǵan. 

- Brazılıanyń Federaldy joǵarǵy sotynyń sýdıasy Edson Fakın jemqorlyq faktisi boıynsha kúdikke alynǵan el prezıdenti Mıshel Temerdiń ústinen qylmystyq is qozǵaýǵa ruqsat berdi. 

- Kosta-Rıka prezıdenti Lýıs Gılermo Solıs Rıvera tilshilerge suhbat berip turyp, ushyp júrgen arany jep qoıdy. 

- Qytaı kompartıasynyń 19-seziniń sheshimine sáıkes Sı Szınpın QKP OK bas hatshysy bolyp qaıta saılandy. 

- Túrikmenstan prezıdenti Gýrbangýly Berdymuhamedov Reseı prezıdenti Vladımır Pýtındi ótken týǵan kúnimen quttyqtap, oǵan «Vernyı» degen alabaı kúshigin syıǵa tartty. 

- C-SPAN zertteý deregi boıynsha amerıkalyq tarıhshylar Barak Obamany AQSH prezıdentteriniń reıtıńinde 12-orynǵa laıyq dep tapty. Bir qyzyǵy kóshbasshylar reıtıńi boıynsha Donald Tramp eń tómengi kórsetkishti kórsetti. Ol AQSH prezıdentteri arasyndaǵy sońǵy 70 jyl ishindegi eń tanymal emes memleket basshysy degen atqa ıe boldy. 

- Úkimet áskeri ókilderiniń kıimderin kıgen 50-ge jýyq sodyr Fılıppın prezıdenti Rodrıgo Dýterteniń kúzeti men eki avtokólikke oq jaýdyrdy. Shabýyl barysynda jeti áskerı qyzmetker jaraqat aldy. 

- AQSH-tyń burynǵy prezıdenti Bıll Klınton úlken jáne kishi Djordj Býshtarǵa ornatylǵan eskertkishterdiń janynda sýretke tústi. Eki Býshtyń arasynan syǵalap turǵan Klıntonnyń beınesi BAQ pen áleýmettik jeli qoldanýshylaryn kúlkige qaryq qyldy. 

- Saýd Arabıasynyń koroli Salman taq muragerin aýystyrdy, endi Mýhammed ben Naıftyń ornyna 31 jastaǵy óziniń uly Mýhammed ben Salman taǵaıyndaldy. 

- Samarqandta Ózbekstannyń tuńǵysh prezıdenti Islam Karımovtyń eskertkishi ornatyldy. Eskertkishtiń ashylý saltanatyna memleket basshysy Shavkat Mırzıeev qatysty. 

- Vashıngtonda qyrǵyzstandyq azamat AQSH prezıdenti Avraam Lınkolnniń memorıalyna esimin oıyp jazǵan. Oqıǵa 2017 jyldyń 8 qyrkúıeginde boldy. 

- AQSH-tyń burynǵy Memlekettik hatshysy Hılları Klınton byltyrǵy prezıdenttik naýqan týraly memýarlaryn jaryqqa shyǵardy. Kitap "What Happened?" («Ne jaǵdaı boldy?») dep atalady. 

- Italıanyń Boloná qalasyna barǵan Rım papasy Fransıskonyń kelýi qurmetine jaıylǵan qaıyrymdylyq dastarhany kezinde qaýipti qylmysker sanalatyn eki Neapol týmasy qashyp ketken. Túski asqa myńdaǵan adam shaqyrylǵan. Shara sońynda túrme baqylaýshylary qylmyskerlerdiń qashyp ketkendigin anyqtady. 

- Fransýz Polınezıasy aralyna attanǵan AQSH-tyń burynǵy prezıdenti Barak Obama ózinen keıingi saılanǵan prezıdent Donald Tramptyń saıasatyna kóńili tolmaıtynyn bildirip, eldiń saıası ómirine qaıta oralatynyn aıtty. 

- «Harvı» daýylynan zardap shekken Kolej-Steıshen qalasynda qaıyrymdylyq konserti uıymdastyryldy. Oǵan AQSH-tyń burynǵy prezıdentteri Djımmı Karter, Bıll Klınton, úlken Djordj Býsh jáne onyń uly kishi Býsh, sondaı-aq Barak Obama qatysty. 

- Zımbabve prezıdenti Robert Mýgabe otstavkaǵa ketkennen keıin álemdegi eń qart memleket basshysy retinde Ulybrıtanıa patshaıymy İİ Elızaveta tańdaldy. Ol 91 jasta. Ekinshi orynda 90 jastaǵy Týnıs prezıdenti Bedjı Kaıd ás-Sebsı. Úshinshi orynda Kýveıt ámiri Sabah ál-Ahmad ál-Djaber ás-Sabah tur. Onyń jasy 88-de. Odan keıingi oryndarda Kamerýn prezıdenti Pol Bıııa (84), Lıvan prezıdenti Mıshel Aýn (84), Japonıa ımperatory Akıhıto (83), Saýd Arabıasynyń koroli Salman ben Abdýlazız (81) tur. 

- Ýkraına Grýzıanyń burynǵy prezıdenti Mıhaıl Saakashvılıge bosqyn mártebesin berýden bas tartty. Bul jaıly jýrnalıserge Ýkraınanyń bas prokýrory Iýrıı Lýsenko málim etti. 

- Úlken Djordj Býsh AQSH-tyń kózi tiri burynǵy prezıdentteri arasyndaǵy eń qart eks-prezıdent atanyp, Amerıka tarıhynda óz rekordyn ornatty. 

- Brazılıa prezıdenti Mıshel Temerge ýrologıalyq aýrýyna baılanysty jasalǵan ota sátti ótti.