Jol qozǵalysyna baılanysty erejelerdi qyryq quıqyljytqan ishki ister mınıstrligine, solar usynǵan shala-sharpy zańdardy qabyldaı salǵysh májilis, senat depýtattaryna, ásirese alaqanyn ysqylap, «asyra silteý bolmasyn, asha tuıaq qalmasyn» dep ala taıaǵyn kóterip iske kirispekshi MAI qyzmetkerlerine qaradan-qarap qanym qaınap otyrǵany-aı!.. Astymda jekemenshik kóligim de joq. Bylaı qaraǵanda, olardyń mende, meniń olarda sharýam bolmasa kerek-ti. Nege sharýam bolmasyn?! Oılaımyn: jerdiń asty da, ústi de tonalyp bitti. Memleket esebinde qalǵan azyn-aýlaq múlik-múkammal qazir júrip jatqan «zańdastyrý» naýqany nátıjesinde ornyn tabady. Sonymen, ne qalady? Munaıdan túsetin tabys azaıǵan tusta memleket pen onyń mıllıon sandy sheneýnikterine elden ne jeýge bolady? Syzdyqtatyp qanyn sorǵandaı elden úzdiksiz jeýdiń men biletin eki-úsh kózi bolǵan, bolady, bola beredi. Ár jalaqydan alynatyn tabys salyǵy bar (búginge deıin 10 paıyz edi, sony kóbeıtý - kózqurty). Zeınetaqy qoryna jiberiletin mindetti jarnamyz bar (10 paıyz, ony da kóbeıtkisi keldi...túbi kóbeıtýi múmkin). Eń basty kózdiń birinshisi – komýnaldyq qyzmetter úshin alynatyn tólemder. Jyl saıynǵy qaıǵymyz — tólemderdiń ósip ketpeýi. Ósip jatyr. Gaz ósedi. Sýdyń baǵasy ósedi. Elektr qýaty úshin tólem ósedi. Jylý ósedi. Jer, múlik salyǵy ósedi. Halyq kúızele túsedi, paıda – monopolıalyq alpaýyttarda, aksıa ıelerinde! Ekinshi kóz – jekemenshik kólik. Odan qozǵaltqyshtyń kólemine qaraı kólik salyǵyn alady, tehbaıqaý, saqtandyrý... Osy jerde áńgimemizdiń basyndaǵy qynjylysqa qaıta oralaıyn. Jol toryǵan MAI úshin «maıshelpek» (halyqty tonaý!) - osy kólikter. Jańa zańnyń bári solardyń qaltasyn toltyrý úshin qabyldanatynǵa uqsaıdy. «Toqtat, tekser, aıyp sal!» deıdi. Onyń quqyǵy bar, kólik ıesiniki joq...(MAI-ǵa jol boıynda turýǵa tıym salynyp, jol-kólik oqıǵasy bolǵanda ǵana kelý týraly zań qabyldasa qaıtedi?) Reseıden sál arzanǵa kólik ákelgender qaǵazbastylyqqa tap bolsyn, aqshasyn paraǵa bersin degen zań da shuǵyl qabyldandy, áne!.. Aqtóbede aq qar, kók muz jol ústinde úlken júk kólikti toqtatyp, artynan kele jatqandy aldyńǵyǵa soqtyryp, apat jasap, ózi qashyp ketken MAI – búkil áriptesteriniń shyn beınesin pash etpedi me?! Bir-eki jyl buryn bir oǵashtaý oqıǵa boldy. Almatydaǵy shyǵys aınalma jolynda bir esersoq ádeıi rúldi buryp baryp, joldyń qarsy betinde turǵan jol polısıasyn qaqty! Esersoqtyń qylmystyq isi dep jyly jaýyp tastadyq. Biraq, ol - búkil kólik júrgizýshilerdiń MAI-da óshi bar ekenin, olardy jaý tutatynyn áıgilemedi me?! Memleket bıligin senip tapsyrǵan «qalaýlylar» jemqorlyqqa jol ashatyn oısyz zańdarmen halyqtyń narazylyǵyn týǵyzyp, órshitip otyr. Kim jaýapty?!

Bolat Jetekbaı, Facebook paraqshasynan