Ánshi Alı Oqapov resmı túrde Almaty qalasy Jastar saıasaıaty máseleleri jónindegi basqarmasynyń múshesi bolyp taǵaıyndaldy. Osy jaıynda tolyq aqparat alý úshin Alı myrzamen suhbattasyp, naqty jaýaptaryn alǵan edik.
- Birinshiden, Almaty qalasy Jastar saıasaty máseleleri jónindegi basqarmasynyń múshesi bolyp taǵaıyndalýyńyzben quttyqtaımyz. Múshelikke qalaı taǵaıyndaldyńyz?
- Jalpy múshelikke taǵaıyndalatyn adamdar arasynda irikteý ótti. Iaǵnı, ınternet arqyly onlaın daýys berý júrgizilip, daýys berildi. Nátıjesinde kóp daýys jınaǵan úmitkerler múshelikke qabyldandy.
- Múshelikke taǵaıyndalýǵa kim usynys jasady nemese ózińiz nıet bildirdińiz be?
- Joq, men ózim usynys jasaǵan joqpyn. Jalpy ákimshilik ózderi kandıdat bolýǵa laıyqty dep sanap, menen «irikteýge qosýǵa bola ma?» dep ruqsat surady. Men ruqsatymdy berdim. Árıne, bul kútpegen nátıje boldy. İrikteýden óttim. Daýys jınaý jaǵynan ártisterge ońaı deýge bolady. Biraq biz eń kóp daýys jınaǵandar qatarynan emespiz. İrikteýden ótken barlyq ártisterdiń nátıjesi ortasha boldy. Kóbimiz eki myńǵa jýyq daýys jınappyz. Aramyzda on myńǵa deıin daýys jınaǵan basqa sala ókilderi de bar. Jalpy biz ózimizdi usynyp, halyqtan daýys jınaǵan joqpyz. Men ózim baıqaǵan da shyǵarsyzdar, eshbir áleýmettik jelide, suhbattarymda bul jaıly aıtqan da joqpyn, «maǵan daýys berińizder» degen áńgime bolǵan joq. Sebebi, birinshiden ádil bolýy kerek, ekinshiden kimge daýys berip, kimdi tańdaıtynyn halyq ózi biledi.
- Endi músheliktegi qyzmetińiz ben mindetińiz qandaı?
- Biz keńes retinde jastar máselesine baılanysty jınalyp, bir-birimizben keńesip otyramyz. Árbir otyrysta túrli máseleler tóńireginde sóılesip, sheshý máselesin qarastyramyz. Naqty bir mindetimiz bar deýge bolmaıdy.
- Aldynda ártister jaıly aıtyp kettińiz, sizden basqa taǵy qandaı shoý-bıznes ókilderi múshelikke taǵaıyndaldy?
- Akter Anýar Nurpeısov, sırk ártisi Murat Mutyrǵanov, voleıbolshy Sabına Altynbekova, NTK arnasynyń júrgizýshisi Saltanat Bekjigitova.
- Shyǵarmashylyq jumystaryńyzǵa kedergi keltirmeıdi ǵoı?
- Joq, múldem kedergi keltirmeıdi.
Suhbattasqan Aıda JUMAǴALI
Baistars.kz
