Azıalyq zertteýlerdiń eýropalyq ınstıtýtynyń sarapshysy Alberto Túrkstra Elbasy Nursultan Nazarbaev pen AQSH Prezıdenti Donald Tramptyń kezdesýi qorytyndysyna pikir bildirdi, dep habarlaıdy Qamshy.kz aqparat agenttigi Qazaqparatqa silteme jasap.

«Qazaqstan Táýelsizdik alǵan kezeńnen bastap AQSH-tyń mańyzdy strategıalyq seriktesi boldy. Shyn máninde, KSRO ydyraǵannan keıin Qazaqstan Respýblıkasynyń Táýelsizdigin alǵashqy bolyp moıyndaǵan elderdiń biri AQSH ekeni belgili», - dep toqtaldy A. Túrkstra.

Sarapshynyń paıymynsha, kóptegen perspektıvaly jobalarǵa baılanysty turaqty Ortalyq Azıa Vashıngton úshin mańyzdy. Atap aıtqanda, óńir búginde strategıalyq jaǵdaıǵa ıe, sebebi Qytaıdyń, Ońtústik Azıa men Taıaý Shyǵystyń qarqyndy damyp kele jatqan naryqtary arasynda turǵan Ortalyq Azıanyń tartymdylyǵy arta tústi.

Sonymen qatar Alberto Túrkstra Qazaqstan ekonomıkasyna ınvestısıa salýda AQSH-tyń aldyńǵy qatarly rólin aıta kele, jańǵyrtý baǵdarlamalaryn júzege asyrǵannan keıin bul baǵyttaǵy baılanystar arta túsetindigin sóz etti.

«Qazaqstan uzaq merzimdi perspektıva turǵysynda turaqty ekonomıkalyq sektorlarǵa betburys jasap otyr. Osy oraıda ekonomıkanyń básekege qabilettigi men ónimdiligin arttyrý baǵytynda tıisti qadamdar iske asyrylýda», - dep atap ótti ol.

Onyń aıtýynsha, Qazaqstannyń jańǵyrtý men ártaraptandyrý josparlary amerıkalyq ınvestorlar úshin tartymdy bolýy múmkin.

«Bul rette aýyl sharýashylyǵy, aqparattyq tehnologıalar jáne ózge de basymdyqty salalar boıynsha ózara is-qımyldar  artady degen oıdamyn», - dep túıdi Alberto Túrkstra.