Saıasat sahnasynda kórinbeı ketken tulǵalar týraly aıtqanda Aslan Mýsın men Nurtaı Ábiqaev oıǵa oralady. Uzaq jyldar boıy Qazaqstanda laýazymdy qyzmetter atqarǵan sheneýnikterdiń aty qazir kóp atalmaıdy.

Jaqynda Aslan Mýsınniń uly shetelde kóz jumǵanda BAQ betterinde burynǵy prezıdent apparaty basshysynyń esimi qaıta atala bastady.

Esterińizge sala keteıik, 24 jeltoqsanda 38 jastaǵy Asylbek Mýsın Rıga qalasynda ǵımarattyń 15-qabatynan qulap qaıtys boldy. Aslan Mýsınniń uly ózine qol jumsady degen boljam bar.

Osy qaıǵyla oqıǵaǵa deıin Aslan Mýsın tóńiregindegi dabyra biraz báseńdep qalǵan edi. Byltyr zeınet jasyna jetken sheneýnikti Nursultan Nazarbaev otstavkaǵa jibergen.

Ókilettiligi toqtaǵannan keıin Aslan Mýsındi belsendi qyzmette kórmedik. Ol qazir shetelde turady degen aqparat bar. Keıbir sarapshylar Mýsınniń shetelge ketkeni onyń ózi úshin tıimdi ekenin aıtady. Beıresmı derekterge súıensek, ol bala-shaǵasymen Germanıada turady eken. Saıasatker Ámirjan Qosanovtyń pikirinshe, Aslan Mýsın saıasat sahnasynan ketse de, Nazarbaev ony kez kelgen ýaqytta bılikke qaıta shaqyrýy múmkin.

– Bizde kez kelgen sheneýniktiń taǵdyry Elbasynyń quzyrynda, ol qalaı sheshedi – solaı bolady. Oǵan esh tań qalýǵa bolmaıdy, - deıdi Ámirjan Qosanov.

Nursultan Nazarbaev alpysty alqymdaǵan Aslan Mýsındi qyzmetinen bosatqanda odan saıası astar izdegender boldy. Degenmen kóbi bul jańalyqty oń ózgeriske balady. Sebebi urpaqtar sabastyǵy, býyn almasý sekildi úrdister saqtalǵanyna rıza boldy. Kez kelgen salada zeınet jasyndaǵy azamattardyń jastarǵa oryn bosatqany – quptarlyq áreket.

Zeınet jasyndaǵy sheneýnikter qyzmetin jalǵastyra berse, bul – halyqtyń qaltasyn qaǵyp, qazynany ysyrap etý. Sebebi memleket qyzmettegi zeınetkerlerge eki ese shyǵyndalady. Oǵan zeınetaqy tóleıdi – bir, jalaqy tóleıdi – eki. Sheneýnikterdiń jalaqysy ortasha jalaqydan áldeqaıda joǵary ekenin de eskerý kerek.

Býyn almasýdyń jańashyldyq pen jańa kózqarasty qalyptastyrý jolynda mańyzy zor. Sebebi jastar jumysqa tyń ıdeıamen keledi. Sáıkesinshe, qazirgi zaman talabyna saı qolaıly jaǵdaı jasap, oń ózgerister engizýge qaýqarly. Osy oraıda Aslan Mýsınniń memlekettik qyzmetten ketýi – qup alatyn jaǵdaı.

Aıta keteıik, Aslan Mýsın 2008-2012 jyldary prezıdent apparatyn basqardy. Atyraý oblysynyń ákimi boldy. QR ekonomıka jáne búdjetti josparlaý mınıstri qyzmetin atqardy. Esep komıtetiniń tóraǵasy, Qazaqstannyń Horvatıadaǵy elshisi boldy.

2017 jyly biraz sheneýnik ókilettiligin toqtatqan edi. Sonyń biri – Nurtaı Ábiqaev. Kezinde «Sur kardınal» atanǵan susty tulǵa Nursultan Nazarbaevtyń senimdi serigi retinde este qaldy.

Saıasattanýshy Seıdahmet Quttyqadam Nurtaı Ábiqaevty prezıdenttiń barlyq qupıasyn biletin adam dep sıpattaıdy. Ekeýiniń bir rýdan, bir otbasynan shyqqanyn meńzeıdi.

Qoǵam belsendileriniń birsypyrasy Nurtaı Ábiqaevtyń 70 jasynda saıası arenadan ketýin qalypty qubylys retinde qabyldady. Alaıda sheneýniktiń bılikten shettetilýin elıtalar qaqtyǵysynyń saldary degender de tabyldy.

Nurtaı Ábiqaevtyń otbasy shetelde turady degen aqparat bar. Burynǵy sheneýniktiń ózi de jaqyndarynyń janynda bolýy yqtımal.

Byltyr Nursultan Nazarbaev sol kezdegi Senat depýtaty Nurtaı Ábiqaevty qabyldaǵanda kópshilik ony jaqsylyqtyń nyshany dep oılady. Nurtaı Ábiqaev jańadan joǵary laýazymǵa taǵaıyndalýy múmkin dep topshylady. Alaıda kóp ýaqyt ótpeı Ábiqaev zeınet jasyna jetýine baılanysty qyzmetinen bosatyldy.

Ámirjan Qosanov zeınetke shyǵýdyń ózinde klandyq-saıası astar bar ekenin aıtady.

– Ábiqaev pen Mýsınniń, árıne, orny bólek, óıtkeni olar Elbasynyń eń jaqyn seriktesteri boldy. Bıliktiń ishinde ne bolyp, ne qoıyp jatqanyn jaqsy biledi, talaı qupıaǵa kýá bolǵan. Bular saıası arenadan ketse, onyń esesine olardyń talaı qurdasy áli de memlekettik, basshylyq qyzmetterde júr. Mýsın men Ábiqaev quıryqtaryna qońyraý baılap jibermegenine táýba desin, typ-tynysh ketpeı, isti bolyp ketýleri de múmkin edi, - dedi Ámirjan Qosanov.