19 qańtarda Astanadaǵy «Týrıs» qonaq úıinde «Jer jeke menshikke satylmasyn, sheteldikterge jalǵa berilmesin» degen taqyrypta dóńgelek ústel ótti, dep jazady Qamshy.kz aqparat agenttigi.

Oǵan qoǵam belsendileri, májilis depýtattary, mınıstrlikterdiń ókilderi qatysty.

Dóńgelek ústel qoǵam belsendisi, ekonomıs Muhtar Taıjan men azamattyq belsendi Aıdyn Egeýbaevtyń ashyq pikirtalasymen bastaldy.

Birinshi sóz kezegi jer máselesi týraly zańǵa engizilgen ózgeristerdi quptaǵan Muhtar Taıjanǵa berildi.

– «Jer satylmasyn», «sheteldikterge jalǵa berilmesin» degen talaptar zańdy túrde qabyldandy. Bul zań aýyl sharýashylyǵynyń problemalaryn túgel sheshe almas, sebebi búginde ondaı múmkindikter áli qarastyrylmady. Alaıda bolashaqta sheshiledi dep úmittenemin, - degen Muhtar Taıjan ózi daıyndaǵan jer máselesine qatysty prezentasıasyn tanystyrdy.

Jer máselesiniń tarıhy, 1990 jyldardan beri Jer kodeksindegi ózgerister qamtylǵan prezentasıasy arqyly Muhtar Taıjan 2015 jylǵy zańdaǵy ózgeristi túsindirdi.

– Zańda «Sheteldikterge aýyl sharýashylyǵyna arnalǵan jerler jalǵa beriledi, Qazaqstan azamattaryna jer jalǵa berilmeıdi. Qazaqstan azamattary jermen aınalysqysy kelse, satyp alýy kerek», - delingen. Biz bul normany joıdyq. Sheteldik azamattarǵa jer jalǵa berilmeıdi, jer eshkimge jeke menshikke satylmaıdy. Bul moratorıı 5 jylǵa jarıalandy jáne tek Prezıdenttiń Jarlyǵy emes, ol – zań, - dedi qoǵam belsendisi.

Muhtar Taıjannyń pikirine qarsy Aıdyn Egeýbaev agrarlyq komıtet ókildikteriniń jınalysta boı kórsetpegenin synady.

«Eger memlekettik organ osynda kelip ózderi túsinikteme bermese, qabyldanyp jatqan zańnyń ózi zańsyz», - dedi Aıdyn Egeýbaev.  

Aıdyn Egeýbaev «moratorıı degendi umytýymyz kerek, jer satylmaýy, sheteldikterge berilmeýi kerek, muny talqylaýdyń qajeti joq», - dedi.