Elimizdiń burynǵy ulttyq ekonomıka mınıstri Qýandyq Bıshimbaevtiń isine qatysty sotta prokýrorlar jańa aıyptaý aktisin oqydy, dep habarlaıdy Qamshy.kz aqparat agenttigi QazAqparat-qa silteme jasap.

«Bul qylmystyq is boıynsha jedel sharalar 2016 jyldyń aqpanynan bastap júrgizildi. Qylmystyq is 2016 jyldyń 9 tamyzynda tirkeldi. Shamamen 7-8 aı boıy tergeý júrgizilip, nátıjesinde aıyptaý aktisi jasaldy. Atalǵan aıyptaý aktisinde bizdiń qorǵalýshymyz (Qýandyq Bıshimbaev) qashan, qaıda, qandaı jaǵdaıda, qandaı tulǵalardyń qatysýymen belgili bir qylmysty jasaǵany jan-jaqty baıandalǵan. Búgin aıtarlyqtaı ózgeristerge ushyraǵan jańa aıyptaý jarıa etildi. Keıbir tulǵalardyń baptary ózgerdi. Bizdiń qorǵalýshymyzǵa qatysty bap sol kúıinde qalyp otyr. Degenmen, qatysýshylardyń quramy aıtarlyqtaı ózgergendigine nazar aýdartqym keledi», - dedi sot otyrysynan keıin BAQ ókilderine advokat Sálimjan Mýsın.

Onyń aıtýynsha, qorǵalýshynyń sybaılastarynyń qatarynan birqatar tulǵa shyǵarylǵan.

«İs júzinde eki jyl boıy aıyptaý barysynda bizdiń qorǵalýshymyzdy belgili bir tulǵalardyń qatysýymen qandaı da bir qylmystardy jasady dep keldi. Sot tergeýi barysynda biz munyń shyndyqqa janaspaıtyndyǵyn dáleldedik. Bir-birine qarama-qaıshy bolǵan barlyq derlik dálelderdi tekserip shyqtyq. Atalǵan qarama-qaıshylyqtardy alyp tastap, bizdiń kózqarasymyzsha qorǵalýshymyzǵa atalǵan qylmystardy jasady degen zańsyz  aıyp taǵylǵandyǵyn is júzinde dáleldedik», - dedi Mýsın. 

Sálimjan Mýsınniń atap ótýinshe, jańa aıyptaý aktisine baılanysty keıbir dálelderdi zertteýge qaıtarý josparlanyp otyr.

«Negizinde solaı bolatyndyǵyna kúdiktenbeımiz de. Biz sony tabandy túrde talap etetin bolamyz», - dedi ol.

Aıta keterligi, sot otyrysy barysynda prokýror Álibek Aıtjanov Qýandyq Bıshimbaevty memlekettik qyzmetti oryndaýǵa ókiletti tulǵa bola otyryp, deldaldar arqyly iri kólemde para aldy dep aıyptaǵan bolatyn.

Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq búro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq búrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalýda.

Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JSHS-nyń vedimistik baǵynystaǵy kompanıasy men onyń merdigerlik uıymy «Shymkenthımmontaj» JSHS arqyly 1 mlrd teńge jymqyrý qylmystyq sqemasyn uıymdastyrdy degen kúdikke ilindi.

Ótken jyldyń 12 qańtarynda Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanksıa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajattaryn jeke qajettilikterine jumsaǵan.