Úkimettiń búgingi otyrysy bastalmaı turyp QR Premer-Mınıstri Baqytjan Saǵyntaev qatty aıazǵa baılanysty birqatar mindetterdi júktedi dep xabarlaıdy Qamshy.kz aqparat agenttigi QazAqparatqa silteme jasaı otyryp.

"Kesheden beri elimizdiń birqatar óńirlerinde kún raıy qatty sýyp ketti. Sınoptıkterdiń boljamy boıynsha kúshi aıaz taǵy da birneshe táýlikke sozylady. Qazirdiń ózinde elimizdiń alty óńirinde aýa temperatýrasy -30 ben -40 arasynda. Osyndaı úskirik aıaz elimizdiń ońtústigindegi tórt óńirinde bolady degen boljam bar", - dep atap kórsetti B.Saǵyntaev.

Osyǵan baılanysty Úkimet basshysy oblys ákimderine jylý ortalyqtarynyń jumysyn, sonyń ishinde shaǵyn qalalardaǵy jylytý qazandyqtarynyń jumysyn qatań baqylaýǵa alýdy tapsyrdy. Ásirese, aýrýxana, mektep, balabaqshalar sıaqty áleýmettik nysandarǵa erekshe nazar aýdarylýy qajet. "Bilim berý uıymdarynda sabaqtyń bolmaıtyny týraly xalyqty der kezinde xabardar etińizder. Qoǵamdyq kólik keste boıynsha jumys isteýi kerek. Kezekshiliktiń naqty tártibi bolýy shart. Qazirgi jaǵdaıǵa baılanysty "102" dıspecherlik qyzmeti úzdiksiz jumys isteýi tıis. İshki ister mınıstrligi avtojoldardy baqylap, kerek kezde barlyq kólik quraldarynyń qozǵalysyna shekteý qoıý týraly sheshimdi der kezinde qabyldaýy shart",- dedi Úkimet basshysy.

Sondaı-aq, ákimdikter kólik júrgizýshileri men jolaýshylardy jylytýǵa arnalǵan jyljymaly beketterdiń jumysyn uıymdastyrýy tıis. Sol jerde ystyq tamaq berilýi shart. "Memlekettik organdar men jeke menshik uıymdardyń basshylaryna aıtarym, óz qyzmetkerlerińizdi jumysta uzaq ustamańyzdar. Múmkin bolsa, barlyq qyzmetkerlerdi úıge deıin jetkizýdi uıymdastyryńyzdar", - dep atap kórsetti B.Saǵyntaev.