Fılıppın prezıdenti Rodrıgo Dýterte prezıdenttik laýazymda uzaq qalatyn bolsa, áskerılerden memleket Konstıtýsıasyn qorǵap qalýdy surady. Qazirgi ýaqytta elde depýtattar men sheneýnikterdiń ókilettiligin uzartý týraly konstıtýsıalyq reforma talqyǵa salyndy.

Fılıppın prezıdenti áskerı bazaǵa sapary aıasynda óz ókilettiligi bitken soń eldi basqarýdy jalǵastyrsa, áskerı qyzmetkerlerden ózin atyp tastaýdy surady. Sondaı-aq áskerı qyzmetkerler men quqyq qorǵaý organdarynyń mindeti – «Konstıtýsıa men halyqty qorǵaý» ekenin eskertti.

Jergilikti agenttiktiń málimetinshe, ótken aptada Dýtarteniń jaqtaýshylary kongres úkimetiniń palatasynda memlekettiń federaldyq qurylymǵa ótýi úshin konstıtýsıalyq jınalysqa shaqyrýdy daýysqa salǵan. Jańa Konstıtýsıa 2019 jylǵy parlamenttik saılaýdy keıinge qaldyrýǵa jáne depýtattar men sheneýnikterdiń ókilettilikterin uzartýǵa múmkindik beredi.

Fılıppındik Inquirer basylymynyń habarlaýynsha, qoǵam pikiri ekige bólingen. Joǵarǵy sottyń burynǵy sot tóraǵasy kishi Hılarıo Davıde ótken jyldyń aqpanynda «qoldanystaǵy Konstıtýsıa bılikti asyra paıdalanýshylyqtan qorǵaıdy jáne eldi basqarý úderisine halyqtyń belsendi qatysýyn qamtamasyz etedi» dep málimdegen. Osy jyldyń 17 qańtarynda ol «1987 jyly qabyldanǵan Konstıtýsıa memleketimiz úshin, bolashaǵymyz úshin eń tıimdisi bolmaq», - dep óz pozısıasyn taǵy rastady.

Alaıda memleket federaldyq qurylymǵa ótken jaǵdaıda ár aýdannyń saıası pozısıasy kúsheıip, ózindik basqarý dınastıasy qurylýy múmkin degen qaýip elde órship tur. Osyǵan oraı «Halyq bıligi» demokratıalyq partıasy Negizgi zańnyń mátininde bir otbasynyń ókilderiniń ókilettikterin shoǵyrlandyrýǵa jáne olardyń muraǵa berilýine tyıym salýdy usyndy.

Al Dýtarteniń baspasóz hatshysy Garrı Roýg prezıdenttiń óz ornynda merziminen uzaq otyrmaıtynyn, tipti odan buryn ketýi múmkin ekenin málimdedi.

Qoldanystaǵy zańnamaǵa sáıkes Fılıppın prezıdenti alty jyl merzimge saılanady. Sonymen qatar, tórt jyl joǵary laýazymda bolǵan ár azamat ony qaıtadan alý quqyǵynan aıyrylady. Dýtarte 2016 jyly prezıdent bolyp saılanǵan.