Shyǵys Qazaqstan oblysynda dárigerler ishimdikke úıir balany esepke qoıyp, jaǵalaryn ustap otyr. Áli mektepke barmaǵan, árip tanymaıtyn ol ata-anasynyń otyrystarynan keıin staqannyń túbinde qalǵan ashshy sýdy iship, mas bolyp jatady eken. Sonymen, alty jasar uldyń bul qylyǵyna kim jaýapty, ata-anasyna qandaı shara qoldanylady?   
 
Shyǵystaǵy eń kishkentaı maskúnem atanǵan búldirshinniń narkodıspanserdegi emdeý baǵdarlamasy da bólek. Dárigerler alty jasar balany ádben aıyqtyryp bolǵan soń, birneshe aptadan beri psıhologıalyq kómek kórsetken.

– Bul balaǵa ártúrli emdom sharalary jasaldy. Onyń tárbıesine, damýyna kóńil bólinip, qoldan kelgenshe emdep jatyrmyz, - deıdi psıhonevrologıalyq dıspanserdiń bólim meńgerýshisiniń mindetin atqarýshy Lúdmıla Kosheles.

Kishkentaı maskúnem eń aldymen jedel járdem qyzmetkerleri kórgen. Únemi ata-anasynyń yrdý-dyrdý otyrystarynan keıin qaraýsyz qalǵan bala ústeldegi qaldyq araqty iship alady eken. Sońǵy ret qatty mas bolyp, oıanbaı qalǵan sábı aýrýhanaǵa túsipti. 
   
Shyǵys Qazaqstandaǵy mamandar mundaı maskúnemdi birinshi ret emdep otyrǵan joq. Byltyr Rıdderde jansaqtaý bólimine túsken 7 jasar balanyń qanynan da ishimdik tabylǵan. Artynsha búldirshinniń ata-anasynyń kózinshe araq iship, osyndaı kúıge túskeni málim boldy. Al psıhologtar balanyń kózinshe ishimdik ishýdiń saldaryn osyǵan ákeledi dep topshylaıdy.     
 
– Otbasynda áke-sheshesi mas bolyp otyr.  Balany shólmek alyp kel dep jumsaıdy. Uryp soǵady. Bala ne isteıdi? Bala joǵaltady ózin. Úlgi alady ǵoı áke-sheshesinen. Tárbıe joq, tamaǵy joq, - deıdi psıholog Svetlana Qudıarova.

Ázirge Óskemendegi alty jasar balanyń tárbıesi men tártibine baılanysty  kimge qandaı shara qoldanylatyny belgisiz. Jalpy elimizde kámelet jasyna tolmaǵandardyń ishimdik iship, esirtki men psıhotroptyq zattardy qoldanǵany úshin ata-analarǵa jarty mıllıon teńgege deıin aıyppul salynady.

Gúlnur Jaqsylyqova